Топ жарды тәуір жобалар
Астана қаласының әкімдігі мен «Astana Innovations» АҚ-ның бірлесе ұйымдастыруымен «Сарыарқа» республикалық велотрек ғимаратында «Астаналық хакатон» атты IT-жобаларының жарысы өтті.
Бұл шара 2012 жылы мамыр айында тұңғыш рет өткізіліп, оған 100-ден аса адам қатысқан болатын. Биыл да осынша үміткер бақ сынады.
Сайыскерлердің жас шамасына ешқандай шектеу қойылмаған. Оларға қойылған талап – тәулік ішінде ақпараттық технологиялар саласында белгілі бір жобаны ұсынып, іске асыру. Шарт бойынша бағдарламашылар, дизайнерлер мен жобалаушылар, IT-маркетологтар өздерінің IT-жобаларын жасайды.
Жарыстың сыйақы қоры былтырғыдай – 1 миллион теңге. Жіктеп айтқанда, «Астана Innovations» АҚ тағайындаған ол жүлде қорының 500 мың теңгесін «Инновациялық идеяларды дамытуға жәрдем» командасы, 300 мың теңгесін «Нано АТС», ал, 200 мың теңгесін «Кодтың 50 жолы» тобы жеңіп алды. Медиалық қолдау аталымында «Yvision» блог-платформасынан «КазТакси» мен «Өзгеріс.kz» командасы топ жарса, «Нано АТС» командасы ынталандыру сыйлығы ретінде өзінің IT-өніміне «Консалт-Инфо НС» компаниясынан тапсырыс алды. Ал, «Nexus» планшеті Всеволод Леонов пен «Embarcadero» мен «Cheap Taxi» командаларына берілді.
Сондай-ақ, «C.A.P.» талдау және болжау орталығы» қоғамдық қорының арнайы демеушілігімен «IT-бастамаларды қолдаймыз» тақырыбы аясында мемлекеттік тілді дамытуды көздейтін қазақтілді үш жобаға қосымша 300 мың теңге сыйақы берілді. Оның 150 мыңы «Кодтың 50 жолы» жобасына бұйырса, екінші орын алған «Пернебәйге» мен «КазТакси», үшінші орын алған «AstanaAR» әрқайсысы 50 мың теңгеден иеленді. Мұндағы мақсат – ақпараттық технологиялар саласында қазақтілді жастардың белсенділігін арттыру. Осыған орай, www.startupkoldau.kz веб-порталы да ашылған болатын. Ол жерден жас кәсіпкерлердің идеясын тиянақтап, жарыққа шығару үшін тиісті кеңестер мен тегін хостинг алуына болады.
«Жалпы, біз «Smart Astana» бастамасы аясындағы үздік жобаларға қолдау жасауды көздейміз. Жеңімпаздарды біздің мекеме өзінің бизнес инкубаторына қосып, шетелдік венчурлық қорлармен жұмыс жасап, қаржылай және маркетинг жағынан көмек көрсетеді» дейді «Astana Innovations» АҚ сервистік-технологиялық қолдау департаментінің жетекшісі Батырбек Дәуітбаев.
Сөйтіп, заманауи игіліктердің «жілігін шағып, майын ішкен» инноваторлар, бағдарламашылар және ІТ саласында еңбек ететін жастардың озық ойлы идеялары мен жүйелі жобалары елордамыздың өмір сүру сапасын арттыруға арналған жаңашылдықтарын ортаға салды. Талапкерлерге Қазақстанның ең тәжірибелі мамандары мен менторлары көмектесті.
«Енді ең ұтқыр инновациялық технологиялар мен шешімдерді «Smart Astana» – «ақылды қала» жобасы аясында астаналықтардың тұрмысына енгізетін боламыз» дейді ұйымдастырушылар.