ТРАКТОР МОДУЛІН ТАРТУ ЕТТІ
Кеше С.Сейфуллин атындағы Қазақ агротехникалық университетінің Қазақстан-Беларус инженерлік кадрларды даярлау және қайта даярлау орталығында «Беларус-3522» тракторының оқу-әдістемелік макет-модулін салтанатты тапсыру рәсімі өтті.
Бұл – С.Сейфуллин атындағы ҚазАТУ мен «Беларусь тракторы сауда үйі» арасындағы жылдар бойы жалғасып келе жатқан ынтымақтастық белгісі. Салтанатты рәсімге ҚР ІІМ вице-министрі, Қазақстан-Беларус сауда-экономикалық байланыстар мемлекетаралық комиссиясының тең төрағасы В.Божко, Беларус Республикасының Қазақстандағы Төтенше және өкілетті елшісі А.Ничкасов, С.Сейфуллин атындағы Қазақ агротехникалық университетінің ректоры А.Күрішбаев, «Беларус тракторы СҮ» директоры И.Морозов қатысты.
ҚазАТУ ректоры Ақылбек Күрішбаев бірлескен жобаларға сәйкес университет жанынан ғылыми-өндірістік кластер құру, Көкшетау қаласында коммуналдық және ауылшаруашылық техникасын құрастыру бойынша индустриалды-технологиялық парк салу, сонымен қатар университеттің қосалқы шаруашылығында сынақ базасын дамыту жоспарланып жатқанын атап өтті.
Университетке тарту етілген трактор модулінің жалпы массасы – 7 тонна, ұзындығы – 5 метрге жуық, ені – 2 метрден астам және биіктігі 3 метрге тең. Оның көмегімен студенттер тракторлардың асай-мүсейімен жақыннан таныса алады. Бұл машинаның ауылшаруашылық нарығында болашағы зор, демек жас мамандарға оның құрылысы мен пайдалануын қазірден бастап үйрене беру қажет.
Беларус Республикасының Қазақстан Республикасындағы Төтенше және өкілетті елшісі А.Ничкасов алдағы уақытта екі жақты ынтымақтастығымыз одан әрі дами түсетінін айтты.