ТРАНСПЛАНТАЦИЯ БІЗГЕ ЕНДІ ТАҢСЫҚ ЕМЕС
Астана қаласындағы №1 қалалық ауруханада нефрология және гепатология саласындағы өзекті мәселелер туралы үш күндік шеберлік сабақтары аяқталды.
«Бауыр мен бүйректің шеткі сатысындағы аурулар және туыстық трансплантация» тақырыбында гастроэнтерологтарға, гепатологтар мен нефрологтарға, хирургтар мен трансплантологтарға арналған шара аясында Н.Склифосовский атындағы Жедел жәрдем ғылыми-зерттеу институтының мамандары бауыр мен бүйректі трансплантациялау бойынша операциялар жасады.
Мамандардың мәлімдеуінше, елімізде жеті мыңға жуық адам осы немесе басқа ағзаларды алмастыруды қажетсінеді екен. Үстіміздегі жылдың басынан бастап елімізде тірі донордан бүйректі алмастыру бойынша елу бес операция жасалған. Бүгінгі таңда Қазақстанда ағзаларды трансплантациялаумен сегіз клиника айналысады.
№1 қалалық аурухана – Қазақстандағы трансплантологияны дамытатын қалалық деңгейдегі алғашқы аурухана болып табылады. Бұл – туыстық трансплантация бойынша аурухананың екінші тәжірибесі. Аталмыш аурухананың бас дәрігері А.Цой алғаш рет бауырды трансплантациялау бойынша операция 2012 жылғы ақпан айында жасалғанын айта отырып, қазір пациент пен реципиент өздерін өте жақсы сезінетінін әрі қалыпты өмір сүріп жатқандарын жеткізді.
Бұл жолы туыстық трансплантация бойынша төрт операция: біреуі бауырды, ал, үшеуі бүйректі трансплантациялау бойынша жасалыпты. Олардың бірін аурухана ұжымының өз қызметкерлері жасапты.
Әмина Адай