Кеше Астана қаласы Кәсіподақ орталығының қоғамдық қабылдауы өтті.
Оған қатысқан ҚР Кәсіподақтар федерациясының және қалалық кәсіподақ орталығының басшылығы, қалалық мәслихат, елордалық прокуратура, Еңбек, әлеуметтік қорғау және көші-қон комитетінің Астана қаласы бойынша департаменті, Жұмыспен қамту, еңбек және әлеуметтік қорғау басқармасы, сондай-ақ, түрлі қалалық мекемемелердің кәсіподақ өкілдері қала тұрғындарының шағымдарын тыңдап, тиісті кеңестерді берді.
Алғашқы болып қабылдауға «Қазақстан темір жолы» ҰК» АҚ қызметкерлері Сәуле Чубаева, Алтынай Қосақова және Салтанат Шыныбекова кірді. Біріншісі «Саранда» тұрғын үй кешенінен шыға берісте бағдаршам орнатылуын сұрады. Оның айтуынша, сол маңда бағдаршамның жоқтығынан адамның өміріне қауіп төнетін жағдайлар жиі орын алады.
«Кейінгі кезде Астанада автокөліктің көбейгені баршаға мәлім. Көтерген мәселеңізді жол полициясына, атқарушы органдарға жеткізіп, шешуге тырысамыз» деді Астана қаласы Кәсіподақ орталығының төрағасы Сәрсенбай Мыңбаев түйткілдің ескерусіз қалмайтынына сендіріп.
Екіншісі болса, Еңбек келісімшартын бұзу, жұмысшыны зейнеткерлік жасқа жеткен соң жұмыстан босату, жұмыскерді тиісті қызметті дұрыс атқармағаны үшін екінші мәрте жауапкершілікке тарту, өтемақы төлеу, белгілі бір адаммен Еңбек келісімшарты бұзылған соң жұмыспен қамту органдарына хабарлау немесе хабарламау сынды бес мәселе бойынша кеңес сұрады. Салтанат Шыныбекова жаңа жұмыс кестесіне көшу жөнінде сұрақ қойды.
Оларға аталған мәселелер бойынша тиісті түсініктемелер берілді.
Аманғали ҚАЛЖАНОВ
