Тұрғындарға тиімді қызмет
Қағаздар электрондық нұсқаға ауыса бастағалы жұртшылықтың қолы жеңілдеп, уақыты үнемделген жайы бар. Бүгінде елордалық әкімдік көрсететін мемлекеттік қызметтердің 19-ы автоматтандырылған. Күнделікті өмірімізге дендеп еніп жатқан электрондық қызметтердің артықшылығы, тиімділігі неде? Оны қалай қолдануға болады?
Ыңғайлы әрі қолжетімді
Бүгінде үйіңізде отырып-ақ «электрондық үкімет» арқылы мекенжай анықтамасын, жылжымайтын мүліктің бар-жоқтығы жөнінде, зейнетақы аударымдары туралы анықтамаларды алып, жеке кәсіпкерлікті, некеге тұру туралы өтінішті беруге және тұрғын үй мен балабақша кезегі қалай жылжып жатқанын білуге болады. Ол үшін қолыңызда электрондық цифрлық қолтаңба болуы керек. Мұны халыққа қызмет көрсету орталықтарынан немесе электрондық үкімет сайтындағы «ЭЦҚ» айдарын ашып, сұраныс жіберу арқылы алуға болады. Осы қолтаңбаны жеке компьютеріңізге немесе өзіңізде жүретін флеш-картаға сақтап қоюыңыз керек. Кейін қандай да бір анықтама қажет болған кезде egov.kz сайтына кіріп, сандық қолтаңбаңызды қою арқылы тиісті құжатты әп-сәтте қолға тигізуге болады. ЭЦҚ бір жылға ғана жарамды, қолтаңбаңызды жылына бір рет ауыстырып отыруыңыз керек.
Жұртшылыққа қажетті қызметтердің көпшілігі электрондық нұсқаға көшкеніне қарамастан, халыққа қызмет көрсету орталықтарындағы кезек әлі күнге азаяр емес. Кезегін күтіп сарылып отырған адамдардың сөзінен түйгеніміз, көпшілігі электрондық қызметті қолдануды қиынсынатынын айтты. Яғни, тұрғындар әлі күнге құжаттарды электронды нұсқада алуға жатырқай қарайды. Астана қаласы әкімдігінің Мемлекеттік қызметтер көрсету сапасының сақталуын бақылау жөніндегі бөлімінің басшысы Руслан Бешеев бізбен әңгімесінде: «Халық техникамен тіл табысқаннан гөрі, тиісті жерге өз аяғымен барғанды жөн көреді. Шынтуайтында, халыққа қызмет көрсету орталығындағы мамандар да сұратқан құжаттарды электрондық үкіметтің сайтына сұраныс жіберу арқылы алады. Ал, бұл әркім үйінде отырып-ақ пайдаланатын қызмет. Ол үшін әуреленіп, кезекке тұрып, уақытты жоғалтудың қажеті жоқ. Тұрғындар әзірше электронды қызметтің қызығына түсе алмай жатыр. Мүмкін, олар электрондық қызметтің түрлері туралы ақпаратпен жете таныс та емес шығар. Бірақ түптің түбінде бәрі жаппай осы заманауи жүйеге көшетініне сенемін» дейді.
Мемлекеттік қызметтердің электрондық үлгіге көшуі – билік пен халықтың арасын жақындатудың, әкімшілік кедергілерді жоюдың және сыбайлас жемқорлыққа қарсы тұрудың бірден-бір тәсілі. Мемлекеттік қызметтің сапасы жақсарса, қоғам да алға басады. Демек, сапаның жақсаруына, еліміздің өркениетке жетуіне әр азамат үлес қосуы тиіс.
Қажетті ақпарат алаңы
Астана қаласына арналған жеке электрондық қызмет порталы (e.astana.kz) бар. Осыдан екі жыл бұрын іске қосылған е-әкімдік арқылы 19 мемлекеттік қызметті электрондық үлгіде алуға болады. Астана қаласы әкімдігінің Мемлекеттік қызметтер көрсету сапасының сақталуын бақылау жөніндегі бөлімінің басшысы Руслан Бешеевтің айтуынша, е-әкімдікте астаналықтарға қажет қызмет түрін барынша қамту жоспарланған. Қазірдің өзінде бұл порталдан тұрғындарға аса қажет мәліметтерді табуға болады. Мысалы, Астанадағы жолаушылар көлігінің бағыт-бағдарын, қай кезде, қайда келетінін бақылап отыруға мүмкіндік беретін maps.astana.kz жобасының өзі неге тұрады? Қажетті автобустың қайда келе жатқанын білу үшін міндетті түрде компьютерді қосудың қажеті жоқ. «Астананың жол картасын» андроиды бар ұялы телефондарға «Google Play» арқылы жүктеп алуға болады.
Сондай-ақ, электрондық әкімдіктің аясында Астана қаласы бойынша жұмысқа орналастыру порталы да (job.astana.kz) іске қосылды. Жұмыс іздеуші қажетті мамандық бойынша бос орындармен танысып, өз түйіндемесін тиісті мекемеге жібере алады. Бүгінде елорданың жұмысқа орналастыру порталына 4 мыңнан астам адам тіркелген екен. Былтыр жұмысқа орналастыру порталын 100 мыңнан астам адам қолданған.
Электрондық қызмет дегенде қалада орнатылған ақпараттық киоскілер туралы айтпай кетуге болмас. Бүгінде елорданың 30-ға жуық нүктесінде, атап айтқанда, ойын-сауық орталықтарында, аудандық әкімдіктері де, теміржол вокзалы мен сапаржайда осындай үлкен интерактивті тақта орнатылған. Осында жұртшылық қала әкіміне сұрақ қоя алады, жедел қызметтерге телефон соға алады, қаланың жаңалықтарымен танысады. Қысқасы, электрондық әкімдік аясындағы барлық қызметтерді осы ақпараттық киоскіден ала алады.
Биыл жылдың аяғына дейін веб-портал тағы бір керекті қызметті іске қосқалы отыр. Онда елордадағы тұрғын үйлер туралы мәлімет енгізілетін болады. Яғни, әр астаналық үйінен шықпай-ақ, портал арқылы өзі тұратын үйдің жағдайы, оған жүргізілетін ағымдағы және күрделі жөндеу жұмыстарымен танысып, үйдің құжатын, қашан салынғанын, ысырылуға қашан жіберілетіні туралы мәліметтерді көре алады. Ол үшін жергілікті веб-порталға тіркелсе болғаны.
Қымбат ТОҚТАМҰРАТ