Нұр-Сұлтан қаласының әкімі Алтай Көлгіновтің бастамасымен елорда мәслихаты және өнер қайраткерлері Түркістан қаласындағы «Ақжайық» музыка мектебіне арнайы барып, Тәуелсіздіктің 30 жылдығы шеңберінде мектеп оқушыларына музыкалық аспаптарды тарту етті.
– Түркістан тек облыс орталығы ғана емес, бүкіл түркі әлемінің астанасына айналып отыр. Осындай бір керемет заманауи үлгіде салынған мәдениет ошақтарының ішінен талай еліміздің өнер саласының майталмандары тәрбиеленіп шығады деп ойлаймын. Міне, бүгін өнер көрсеткен 138 баланың әрқайсысы әр бағытта таңдаған өнерлері бар екеніне көзімізді жеткіздік. Сол балаларға толық білім алып, өздерінің мәдени және рухани талпыныстарын арттыру үшін осы музыкалық аспаптарды сыйлап отырмыз, – деді Нұр-Сұлтан қаласы мәслихатының хатшысы Ерлан Каналимов.
Заманауи үлгіде салынған мектепте оқушылар өнердің оннан аса түрінен дәріс алады. Атап айтқанда, домбыра, қобыз, жетіген, фортепиано, скрипка, вокал, ұрмалы аспаптар, ән-терме, баян және саксофон. Үйірмелерге консерватория түлектері ұстаздық етіп, оқушылар республикалық байқауларда жүлделі орындарға ие болуда.
– Кез келген мемлекеттің ертеңі өскелең ұрпақ екені заңдылық. Әсіресе, елдің, ұлттың болашағы, әрине, дарынды, өнерлі, білімді, интеллектуалды және зерделі ұрпақтың қолында. Сондықтан бүгін біз елордадан Түркістан қаласына арнайы ат басын бұрып, бүкіл түркі дүниесінің алтын бесігі іспеттес Түркістандағы «Ақжайық» музыка мектебіне елорда әкімдігі мен мәслихатының, Нұр-Сұлтан қаласындағы өнер қайраткерлерінің атынан арнайы тапсырыс беріп жасалған, сапасы өте мықты домбыра, қылқобыз, жетіген, баян, скрипка, прима-қобыз секілді аспаптарды алып келдік. Бұл аспаптар арқылы болашақта Түркістандағы «Ақжайық» музыка мектебінде білім алып жатқан жас дарындар өздерінің таланттарын, шығармашылық әлеуетін көрсетіп, республикалық, халықаралық өнер сайыстарында топ жарып шығатынына сенемін, – деді Музыкалық жас көрермен театрының директоры Асхат Маемиров.
Қос қабаттан тұратын сәулетті ғимарат музыкалық аспапта сабақтар өтуге барынша лайықталған. Аталған мекеме мамандарының айтуынша, келешекте үлгерімі жақсы шәкірттерден жоғары деңгейлі оркестр құрып, көптеген халықаралық, түркі әлемі елдеріне барып, қазақтың ұлттық аспаптары мен өнерін насихаттайтын болады.
Әділғазы БАҚЫТҰЛЫ
