ТҰРЫНТАЕВ ТӘНТІ ЕТТІ
Астанадағы Ресей ғылым және мәдениет орталығында «Алеф» еврей этномәдени бірлестігі классикалық музыка кешін өткізді. Халықаралық конкурстардың лауреаты Руслан Тұрынтаев П.Чайковский, Паганини, Г.Венявский мен Брамстың туындыларын орындап, тыңдарман қауымды өнерімен тәнті етті.
12 жасынан талғамы биік музыка мамандарының назарына түсіп, Қазақстанның мерейін дүниежүзіне асырып жүрген Руслан туралы газетімізде бірнеше мақала жарияланған болатын. Оқырмандарымыз оның Мәскеу мемлекеттік консерваториясының орталық музыка мектебінде оқып жүргенін, 15 жасында жасөспірімдер арасында өткен сегізінші Чайковский атындағы халықаралық конкурстың жеңімпазы болғанын да біледі. Атақты дирижер, скрипкашы В.Спиваковтың Русланға француз шебері Эмиль Буланженің скрипкасын табыс етіп, оның стипендиаты атанғанын да білеміз. Спиваковтың дуалы ауызымен «қазақстандық Паганини» атанған Руслан атақты маэстроның «Виртуозы Москвы» оркестрімен концерт беріп жүреді. Былтыр Еуропаны түгел шарлап, Мексикада да концерт беріпті.
Жазғы демалысқа келген бойда Русланның елордалықтарға сәлем берген жайы екен. Осы дәстүрді қалыптастыруда «Алеф» этномәдени орталығының жетекшісі Моисей Гольдбергтің үлесі зор. Жасынан жарқ еткен талантты дөп танып, оның ұшталуына атсалысып, жетектеп жүріп Мәскеуге апарған да Моисей Михайлович деуге болады. Тіпті, ақылы оқуға қаражат жинау үшін талай есіктерді ашып, «қазақтың баласы үшін сұрап жүргеніне арланбайтынын» мақтанышпен айтқаны бар. Сондықтан да, Руслан шығармашылығының бастауында Гольдбергтің қамқорлығы айрықша. Ол туралы осы кеште сөз алған қоғам қайраткері Қуаныш Сұлтанов та атап өтті. Русланның шығармашылығын талдағанда, музыка мамандары өрімтал жастың скрипкада ойнау ерекшелігін сөз етпей тұрмайды. Оның орындауында ішекті аспаптың үні өзіндік бояуымен нақыштала түсетінін байқаған.
Русланның Италияда өтетін «Джованни музициенте» сайысына қатысып, XII ғасырда салынған көне храмда Паганинидің мәңгілік туындыларын орындағаны бар. Атақты Никколо Паганини, Джузеппе Мадзинидің отанында қаршадай қазақ баласы атақты скрипкашылардың рухымен тілдескенін сол күндері бұқаралық ақпарат құралдары жарыса жазыпты.
Сонда ырымшыл италиялықтар «баланы маэстро Паганинидің рухы қолдады, құдіреті қонды» деп бірауыздан шулап қоя беріпті. Бірінші орынды олжалаған Русланды генуялықтар қошеметтеп, бар құрметімен шығарып салады. Бұл өнер әлемінің ұшар шыңына бет алған қазақ баласының шетелдегі жеңісінің бір баяны ғана.
Айгүл УАЙСОВА