Түсіндіру жұмыстары жүргізілді
Нұр-Сұлтан қаласының Жастар саясаты мәселелері басқармасы, «Астана жастары» орталығы, Криминалдық полиция басқармасы және Есірткі қылмысына қарсы іс-қимыл басқармасы интернет-алаяқтыққа, есірткіге, ұрлық пен көлік ұрлауға қатысты түсіндіру жұмыстарын жүргізді. Елордалық еріктілер қала тұрғындарына ақпараттық парақшалар таратты.
Нұр-Сұлтан қаласы ПД Есірткі қылмысына қарсы іс-қимыл басқармасының аға жедел уәкілі Әлия Қибатқызы:
– Жастардың дені есірткінің салдарын түсіне бермейді. Ол үшін жауапкершілікке тартылатынынан хабары аз десе болады. Оған жеңіл-желпі қарайды. Олар есірткі деп тек екпе арқылы қолданатын героин деп түсінеді. Жай ғана шегемін деген түсінік – мүлдем қате. Сол себепті жастарға біз синтетикалық есірткінің шынында қауіпті екенін түсіндіріп жүрміз, – деді.
Елімізде жылдан-жылға есірткі қылмысы, интернет-алаяқтық, ұрлық көбейіп келеді. Осыған байланысты тәртіп сақшылары еріктілермен бірігіп, іс-шараларды жиі ұйымдастыруда. Жастарға жаман әдеттерден бойды аулақ ұстауға, саламатты өмір салтын қалыптастыруға үндейтін аталмыш шара адамдар көп шоғырланатын жерлерде ұйымдастырылды.
Бауыржан СЕГІЗБАЕВ