ҰЛТТЫҚ НАҚЫШТА ҰЙЫМДАСТЫРЫЛДЫ
Биылғы Наурыз мейрамын Астана қаласындағы Энергетика және байланыс колледжі айтарлықтай атап өтті. Мереке қарсаңында колледж студенттері үлкен жетістікке жетті.
Еуразия гуманитарлық институты колледжінің ұйымдастыруымен өткізілген «Ғасырлардың құрдасы, Наурыз – елдің жыл басы» атты кәсіптік және техникалық колледждер арасында өткен ертегілер фестивалінде қазақ тілі пәні оқытушысы Г.Сайлаубаеваның бастамасымен колледж студенттері «Ынтымақ» ертегісін көрсетіп, «Ең тартымды ертегі» номинациясында жеңімпаз атанды.
Колледжде ұйымдастырылған Наурыз мерекесіне бүкіл студенттер атсалысты. Мерекені ұйымдастырушы колледж әдіскері Ж.Сауленбекова «Армысың, әз Наурыз!» тақырыбында ұлттық дәстүрімізге сәйкес көрініс және концерттік бағдарлама дайындады. Зал ұлттық нақышта безендіріліп, көрме ұйымдастырылды.
Сондай-ақ, қазақтың ұлттық ойындарынан дене тәрбиесі пәнінің оқытушысы С.Оралов жарыс өткізді. Қазақша күрес, арқан тарту, асық ойыны, қол күресі, кір тасын көтеруден сынға түскен жастарға сыйлықтар берілді.
Мереке соңында Наурыз дастарқаны жайылды.
Өз тілшімізден