Л.Гумилев атындағы Еуразия ұлттық университетінде «Ардагерлер ұйымы» республикалық қоғамдық бірлестігінің ұйымдастыруымен «Ұлы Жеңіс бағасы» атты ғылыми-тәжірибелік конференция өтті.
Жиын басында сөз алған «Мемориалды аймақ» іздестіру жасағының командирі, университеттің архитектура ка-
федрасының профессоры Майдан Құсайынов «Қазақстандық майдангерлердің фашизмді жоюдағы үлесі» атты ғылыми баяндамасында Қазақстанда жасақталған дивизиялардың ұрыс даласындағы қимылы туралы тың деректерді ортаға салды. Сонымен қатар, «Мемориалды аймақ» жасағының хабарсыз кеткен құрбандарды іздеу жұмыстарымен, бауырластар қабірін қайта қалпына келтіру, соғыстан қалған мина, снарядтарды залалсыздандыру жайымен таныстырды.
Қазақстан тарихшылары конгресінің хатшысы Зиябек Қабылдинов Екінші дүниежүзілік соғыстың ұмытылған батырлары туралы баяндай келе, қазақстандықтардың Ұлы Отан соғысында қосқан үлесін анықтайтын институт құру керек деген ойын жеткізді. Украина,
Беларусь, Еуропа елдерінің мұрағаттарында тұрақты жұмыстар жүргізіп, терең ақпарат жинау керектігін айтты.
Тыл және еңбек ардагері Василий Алексеев «Бәрі де майдан, бәрі де Жеңіс үшін» атты ғылыми мақаласында соғыс кезінде балалардың, қарттар мен мүгедектердің де жан аямай істеген ерен еңбектерін айта келе, тәуелсіздіктің қадірін сезініп, оны көздің қарашығындай сақтауымыз керек деген ойымен бөлісті.
Астана қаласының қорғаныс істері жөніндегі департаментінің бастығы Талғат Амангелдиев «Отанды қорғау – әрбір қазақстандықтың қасиетті парызы» тақырыбында толғанып, ардагерлер жолын қуған бүгінгі азаматтардың ерлігі – адал еңбек, ұшқыр білім, сапалы жұмыста екеніне тоқталды.
Ұлы Отан соғысы мүгедектеріне арналған госпитальдің директоры Әділхан Абдуллиннің «Ұлы Жеңіске дәрігерлер үлесі» атты баяндамасында дәйекті мәліметтер келтірілді.
Конференцияға қатысқан Ұлы Отан соғысы ардагері Қадан Бекенов өзінің майдандағы жолы туралы әңгімеледі. Тағы бір майдангер Василий Макаров соғыс жайлы әсерлі өлеңін оқып берді.
Конференция соңында ардагерлерге «Ардагерлер ұйымы» және университет атынан сый-сияпат жасалды.
Гүлнәр ЖҰПАРБЕК,
Л.Гумилев атындағы
ЕҰУ студенті
