ҰЛЫБРИТАНИЯДАҒЫ ОТАНДАСТАР ҰЙЫМШЫЛ
Қазақстан Әнұранымен және Гринвич бойынша таңғы сағат жетіні соққан БигБен қоңырауымен бірге Қазақстан Республикасының Ұлыбританиядағы және Солтүстік Ирландия корольдігіндегі елшілігі жанындағы №194 учаскелік сайлау комиссиясы өз жұмысын бастады.
Ұлыбритания астанасының қақ ортасындағы әйгілі Палмел көшесінде орналасқан Қазақстан елшілігінің қызметкерлері сайлауға қатысуға ықылас таныта келгендерді есік алдынан емен-жарқын қарсы алды.
Сайлаушылардың басым көпшілігі Ұлыбританияда тұрып жатқан қазақ жастары, оның ішінде «Болашақ» бағдарламасы бойынша Тұманды Альбионның маңдайалды университеттерінде мамандық игеріп жатқан студенттер сайлауға белсене қатысуда.
Аталмыш учаскелік сайлау комиссиясының төрағасы, Ұлыбританиядағы Қазақстан елшілігінің кеңесшісі Ғани Бекенов: «Ұлыбритания аумағында тұратын еліміздің азаматтары сайлауға учаскенің ашылу сәтінен ағылып келді.
Әсіресе, британдық университеттерде оқып жатқан қазақ студенттері белсенділік танытуда. Жалпы алғанда, учаскеміздегі сайлау үрдісі тыныш, өте жақсы жағдайда және Қазақстан Республикасының заңдарына сәйкес өтіп жатыр деуге болады.
Бұл сайлау Отанынан жырақта, Ұлыбританияда жүрген барлық Қазақстан азаматтары үшін тек өздерінің сайлау құқыларын жүзеге асыру мүмкіндігі болып қана қоймай, сонымен бірге өздерінің
әрі еліміздің болашағын айқындауға қосқан үлесі деген үміттемін» дейді.
Ғани Шайқы-Исламұлының сөзінің растығына бірінен соң бірі сайлау учаскесіне келіп, өздерінің сайлау құқыларын орындап жатқан отандастарымыздың көптігіне біз де куә болдық.
«Болашақ» бағдарламасының стипендиаты атанып, Саутгемптон университетінде оқып жатқан осы жолдардың авторы да бір топ студенттермен бірге Лондонға таң бозында келіп, алғашқылардың бірі болып дауыс бергенімізді айта кеткім келеді.
Біз тақылеттес қазақ жастары басқа университеттерден келіп, құрбы-құрдастарымен осынау мерекеге толы, тарихи күнде жүздесіп қалып жатқанына бек қуанышты.
Ұлыбританияның жоғары оқу орындарындағы қазақ студенттерінің 70-ке жуық қауымдастығын біріктіріп, ортақ іске жұмылдыруға кіріскен «Казальянс» қоғамдық ұйымының президенті, «Болашақ» стипендиаты Рашид Аюпов өз сөзінде жалпы қазақ студенттері тек сайлауда ғана азаматтық танытып қоймай, сайлауалды науқанға да ұйымдаса атсалысқандарын айтты. Сонымен қатар, олар шетелдерде «Қазақстан-2050» стратегиясын насихаттауды да өз міндеті санайды.
Сайлау учаскесінің ерекше мейманы ретінде Нартай Бекежанов атындағы Қызылорда облыстық музыкалық драма театрының труппасын да айта кетуге болады. «Royal colleedge of Music» оқу орнының театр сахнасында жазушы-драматург Дулат Исабековтің «Tranzit Passenger» («Өкпек жолаушы»), «Ескі үйдегі екі кездесу» пьесаларын сахналаған жерлестеріміз елшілікке қазақтың көк туын желбірете еніп, алыстағы ағайынмен төс қағыстыра амандасты.
Театрдың бас режиссері Хүсейін Әмір-Темір: «Біз бүгін екі тарихи оқиғаның куәгері әрі қатысушысы болдық. Оның бірі – алғаш рет Англияда қазақ пьесасын кәсіби әртістеріміздің сахналауы, екіншісі – елдің ертеңі үшін айрықша маңызды кезең – Қазақстан Республикасының президентін сайлауға қатысты» деді.
Сондай-ақ, елден шалғай Еуропадағы Қазақстан Республикасының Президентін сайлауға елімізден және жергілікті БАҚ-тан бірнеше журналист қатысты.