Елордадағы Ұлттық музейде Қазақстан Суретшілер одағының мүшесі Алмас Сырғабайдың «Ұмытуға болмайды» атты көрмесі ашылды. Саяси қуғын-сүргін және ашаршылық құрбандарының рухына тағзым ретінде ұйымдастырылған көрме бір айға созылады.
Автордың туындыларында әдебиет пен тарихтың ұштасатынын байқаймыз. Ақиық ақын Мұқағали Мақатаевтың шығармашылығын картиналарына көп арқау қылатын суретші-кескіндемеші «Райымбек! Райымбек» поэмасының иллюстрациясын жасады. Әсіресе, «Алаш» партиясы, Алашорда қайраткерлері оның шығармашылығында ерекше орын алады. Атап айтқанда, осыған дейін Әлихан Бөкейхан, Ахмет Байтұрсынұлы, Мұхаметжан Тынышбаев, Мағжан Жұмабаев, т.б. жазықсыз жапа шеккен ұлт тұлғаларының бейнесін кескіндеді. Бұл жолғы жеке көрмесінің тақырыбы да өнерде ұстанған бағытынан алшақтаған жоқ.
Кешегі саяси қуғын-сүргін жылдарындағы қасіретті сурет тілімен сөйлеткен автор «Ақтабан шұбырынды, Алқакөл сұлама» заманынан бері қарай қазақ басына түскен нәубетті көз алдымызға келтірді.
Көрмеге барлығы 20 картина қойылды. Оны тамашалап жүргенімізде арқалы ақын Серік Ақсұңқарұлының «Жиырмасыншы ғасырдың жиырма сәті» атты поэма-панорамасы арасында сабақтастықты аңғардық. «Өткенді еске алу – болашақты болжау. Қуғын-сүргін құрбандарын еске алу – қазақ тарихын еске алу, Алашты ардақтау деп бағалағанымыз абзал. 20 картина 20-ғасырдағы
20 сәттің ішқұсасы болған шерді тарқатады, ойландырады, сананы жаңартады, жастарға бағыт-бағдар береді» деген Нұр-Сұлтан қаласы Суретшілер одағының төрағасы Жанұзақ Мүсәпірдің сөзі де бұл ойымызды бекіте түсті.
