«Ұмытылған батырлар» оралды
Кеше ҚР Ұлттық мұражайында белгілі саясаттанушы Берік Әбдіғалиұлының «Забытые герои. Герои Советского Союза» атты кітабының тұсаукесер рәсімі өтті.
Бұл еңбекте ІІ Дүниежүзілік соғыста ерекше көзге түсіп, ерлік көрсеткен отандастарымыз туралы жазылған. Нақтылай айтсақ, мұнда кезінде «Кеңес Одағының Батыры» атағына ұсынылған, алайда, белгісіз себептермен ол атаққа қол жеткізбеген азаматтар туралы баяндалады. Автордың айтуынша, бұл «ұмытылған батырлар» жайындағы мәліметтер Ресей Қорғаныс министрлігінің архивінен алыныпты. Кітапқа енген тұлғалардың аты-жөні мен ерліктері мұрағат деректерінде көрсетілгені болмаса, күні бүгінге дейін назарға ұсынылмапты.
Айта кетер жайт, кітап авторының осыдан бес жыл бұрын Мемлекеттік тілді дамыту президенттік қорының директоры қызметін атқарып тұрған кезінде қолға алған «Халық батыры» жобасы Жеңістің 70 жылдығы аясында жүзеге асып отыр. Әзірге «Кеңес Одағы Батыры» атағына ұсынылған 10 қазақстандық батыр жайында мағлұмат табылған. Жоба мақсаты – тарихи әділеттілікті қалпына келтіру және жас ұрпақ бойына отансүйгіш қасиет дарыту.
Басылым «Нұр Отан» партиясы қоғамдық саясат институты мен «Байқадам холдинг» компаниясының қолдауымен жарық көрді.
Нәзира САЙЛАУҚЫЗЫ