Надежда ПЕТУХОВА, ҚР Парламенті Мәжілісінің депутаты
Елбасы Нұрсұлтан Назарбаев «Қазақстан – 2050» стратегиясы – қалыптасқан мемлекеттің жаңа саяси бағыты» атты Жолдауында мемлекеттің алдында тұрған жаңа міндеттерді айқындап берді. Осы жолғы Жолдауда халықты сапалы және қолжетімді медициналық қызметтер көрсетумен қамтамасыз ету, аурулар түрінің барынша кең спектрін диагностикалау және емдеумен қамтамасыз ету, медициналық білім беру жүйесін түбірімен жақсарту, медициналық жоғары оқу орындары жұмысының тәжірибелік ғылыми-зерттеушілік бөлігіне басты маңыз беру сынды көптеген мәселелер қамтылды. Өз елінің болашағын ойлаған мемлекет ең алдымен өскелең ұрпағының денсаулығына көңіл бөліп, солардың жағдайын жасайды. Осы маңызды міндетті Елбасымыз да үнемі назарда ұстап, Жолдауында 16 жасқа дейінгі балаларды медициналық қызметтің барлық спектрімен қамту қажеттігін баса айтты. Бұл елдің келешегіне тұтқа болатын жеткіншектеріміздің дені сау, саламатты азаматтар болып өсуіне үлкен мүмкіндік беретін игі қадам екені сөзсіз.
Денсаулық – адамның ең басты байлығы. Сондықтан әр азамат өз денсаулығын күтіп, дер кезінде дәрігерге көрініп жүргені абзал. Ауруды емдегеннен, алдын алған жақсы. Президент өз Жолдауында профилактикалық медицина аурудың алдын алудағы басты құрал болуға тиістігін нақтылап берді. Енді медицина саласының өкілдері отандық медицинаның дамуына, қызмет сапасын жақсартуға бір кісідей атсалысып, денсаулық мәселелерін шешуге барын салуы керек.