Астана қалалық Тілдерді дамыту басқармасы Жеңіс мерекесіне орай «Тұран» мейрамханасында елордалық майдангерлер мен соғыс жылдарында тылда еңбек еткен ардагерлерге дастарқан жайып, «Аталар ерлігі – ұрпаққа аманат» атты игілікті шара өткізді.
Ізгілікті шарада алдымен соғыстан оралмаған боздақтар мен бүгінде арамызда жоқ ардагерлердің рухына арнап, дұға бағышталды. Одан кейін Тіл басқармасының бастығы Тілеуғали Қышқашбаев өтіп отырған шараның маңызына тоқталып, ардагерлерге ілтипатты лебізін білдірді. Республикалық Ардагерлер кеңесінің төрағасы Өмірзақ Озғанбаев сол соғыс бұлты төнген жылдардағы қазақстандықтардың ерен ерлігі мен жанқиярлық еңбегі жайында тереңірек сөз қозғады.
– Біз ол күндерді ешқашан ұмытпаймыз. Соғысқа елімізден миллионнан астам адам аттанды. Солардың 700 мыңы елге оралды. Бейбіт күнде туған жердің дамуына ерекше үлес қосты. Бүгінде ардагерлердің тең жартысы төсекке таңылып, үйде жатыр. Сондықтан арамызда жүрген майдангерлерді аялайық. Бір ғана осы Астана табанынан 47 Кеңес Одағының батыры, 7 Даңқ орденінің толық иегері атанған азаматтар шықты, – деді Ардагерлер кеңесінің төрағасы.
Сондай-ақ, елордадағы Қ.Қуанышбаев атындағы Мемлекеттік академиялық қазақ музыкалық драма театрының әртістері қонақтарға соғыс кезінде жазылған ақындардың өлеңдерін оқып, майдан әндерін шырқады. Бауыржан Момышұлының ана тіліміз туралы айтқан толғамдары айтылды. Соғыс ардагері Мінайдар Боранбаев жастарға батасын берді. Тұжырып айтқанда, әдемі кештен қариялардың көңілі бір көтеріліп қайтты.
Азамат ЕСЕНЖОЛ
