Ұстаздар еңбегі ұлықталды
Жуырда Президент Нұрсұлтан Назарбаевтың Қазақстан халқына Жолдауы жарияланды. Бас құжатта білім саласына қатысты маңызды мәселелер қозғалды. Ал, Мемлекет басшысының тапсырмасын жеделдету мақсатындағы шаралар басталып кетті. Айталық, «Атамекен» Қазақстан картасы» этномемориалдық кешені ұйымдастырған «Үздік сабақ» байқауы мәресіне жетті.
«Тәуелсіздік – тірегің, егемендік – елдігің» атты шараның жеңімпаздарын марапаттау рәсімі кеше Бейбітшілік және келісім сарайында өтті.
Байқауға 107 ұстаз қатысып, 89 сабақ өткізген. Оның 74-і – қазақ тілінде, 10 сабақ – орыс тілінде, 5 сабақ ағылшын, орыс, қазақ тілдерінде өтті. Осы сабақтарға барлығы 2225 оқушы атсалысқан.
«Атамекен» Қазақстан картасы» этномемориалдық кешені бұл білім додасын үшінші жыл ұйымдастырып отыр. Мұражай мен мектептердің өзара қарым-қатынасында жаңа үрдіс қалыптастыруды мақсат еткен шараға мектеп басшылары мен ұстаздар белсенді қатысты. Ерекше қызығушылық танытты» дейді этномемориалдық кешеннің директоры Үмітхан Мұңалбаева.
Байқау қорытындысы бойынша жиырма төрт номинацияның жеңімпаздары дипломдармен марапатталды. Сонымен қатар, ұстаздарға демеушілер бағалы сыйлықтар табыс етті. Ал «Үздік сабақ» байқауының бас жүлдесіне ие болған №54 мектептің ұстазы Гүлбарша Бүркітбайқызы мен №68 мектептің мұғалімі Нағашыберген Карбозға жүз мың теңге берілді. Сондай-ақ, «Атамекен» Қазақстан картасы» этномемориалдық кешенімен тығыз қарым-қатынас орнатқан екі ұстазға Түркия мен Біріккен Араб әмірліктеріне жолдама табыс етілді. Осыған қоса 72 ұстаз сертификатпен, 35 мұғалім ерекше дипломмен марапатталды. Ал, байқауды өткізуге белсене қатысып, жоғары ұйымдастырушылық танытқан алты мектептің басшысы мен орынбасарлары алғыс хаттарға ие болды.
Гүлмира АЙМАҒАНБЕТ