Жылдың басынан бері Астананың барлық алты ауданында вейп пен насыбайдың заңсыз таралуы мен қолданылуын анықтау бойынша рейд жүргізілуде. 2025 жылдың үш айында қалада мыңдаған сауда орындары тексеріліп, жүздеген заң бұзушылық анықталды. Жедел профилактикалық іс-шараларды аудандық әкімдіктердің қызметкерлері Астана полиция департаментімен бірлесіп жүргізеді. Рейд жеке кәсіпкерлік объектілерін – сауда орталықтарын, азық-түлік дүкендерін және т.б. қамтиды.
Есіл ауданында қоғамдық орындарда шегілмейтін темекі өнімдері мен кальяндарды тұтынуды бақылау бойынша 30 рейд жүргізілді. Тексеру қорытындысы бойынша 523 құқық бұзушылық анықталды, жалпы сомасы 18 868 235 теңгеге 523 әкімшілік хаттама жасалды, оның 14 749 465 теңгесі өндірілді. Нұра ауданында 21 кәсіпкерлік объектісіне профилактикалық түсіндіру жүргізілді. Тексеру барысында заң бұзудың 12 жағдайы анықталды, оның ішінде қыздырылатын темекісі бар өнімдер, кальянға арналған темекі, кальян қоспалары, темекіні қыздыруға арналған жүйелер, электронды темекі және оларға арналған сұйықтықтар бар. Рейд қорытындысы бойынша қоғамдық орындарда кальян шегуге қатысты тыйымды бұзған мекемелерге келушілерге қатысты 65 әкімшілік хаттама толтырылды. Айыппұлдардың жалпы сомасы 3 млн 325 мың теңгені құрады.
Алматы ауданының аумағында кальян тұтыну және сату жағдайларын анықтау бойынша 11 рейдтік іс-шара өткізілді. 45 жеке тұлғаға айыппұл салынды, сонымен қатар шегілмейтін темекі өнімдерін – насыбай мен снюсті сатуды анықтау үшін 6 рейд жүргізілді. 20 дүкен анықталды, 500-ден астам шегілмейтін темекі өнімдері тәркіленді, барлық құқық бұзушы жауапқа тартылды. Сарыарқа ауданының әкімдігі мүдделі мемлекеттік органдармен бірлесіп 15 рейдтік іс-шара өткізді, оған мемлекеттік органдар мен қоғам өкілдері қатысты. Жыл басынан бері аудан бойынша қоғамдық орындарда кальян шегетін бұзушыларға қатысты ҚР ӘҚБтК 441-бабы бойынша 115 әкімшілік хаттама жасалды.
Сарайшық ауданында шегілмейтін темекі өнімдерін заңсыз сатқаны үшін 196 600 теңге көлемінде айыппұл салынды. 58 дана шегілмейтін темекі өнімдері анықталды: 26 дана снюс және 32 дана насыбай. Рейд барысында 6 сауда нысаны тексерілді, сату фактілері анықталып, дүкен иелері айыппұл түрінде әкімшілік жауапкершілікке тартылды. Байқоңыр ауданының аумағында 16 рейдтік іс-шара өткізілді. 28 дүкен анықталды, 20 кг-дан астам шегілмейтін темекі өнімдері тәркіленді, барлық құқық бұзушы әкімшілік жауапкершілікке тартылды. Сондай-ақ ҚР Әкімшілік құқық бұзушылық туралы Кодексінің 441-бабына сәйкес қоғамдық тамақтану орындарында темекі өнімдерін, оның ішінде қыздырылатын темекі, кальян өнімдерін тұтыну фактілерінің алдын алу және жолын кесу бойынша рейдтік іс-шаралар белсенді түрде жалғасып жатыр.
Естеріңізге сала кетейік, шегілмейтін темекі өнімдерін заңсыз сататын сауда орындарына және вейп сатушыларға әкімшілік хаттама мен 25 айлық есептік көрсеткіш немесе 92 300 теңге көлемінде айыппұл салынады. Заң бұзушылықтар анықталған кезде кальян шегетін адамдарға 15 АЕК мөлшерінде, қайта бұзылған жағдайда – 20 АЕК, ал мекеме иелеріне 20-дан 60 АЕК-ке дейін айыппұл салынады.
Райхан РАХМЕТОВА
