ЫРЫС АЛДЫ – ЫНТЫМАҚ
«Конституция – Қазақстан халқының бірлігінің кепілі» атты Қазақстан халқы Ассамблеясының республикалық акциясының шеңберінде дөңгелек үстел отырысы өтті.
Астана қаласы әкімдігі жанындағы «Қоғамдық келісім» ұйымының жетекшісі Бақытжан Әбілдинов іс-шараның мақсаты – еліміздің Ата Заңын талқылау арқылы қазақстандық ынтымақтастықтың негіздерін баяндап, республикамызда жасап жатқан барша халықтың Конституция аясында бекітілген құқықтары мен жауапкершіліктерін талдау арқылы жеткен жетістіктерімізді насихаттау болып табылатынын айтты. Ал «Вайнах» шешен-ингуш этномәдени орталығының жетекшісі Салман Героев өз сөзінде ел Тәуелсіздігінің қазақ жерінде жасап жатқан барлық ұлт өкілдері үшін маңыздылығына тоқталды. Осы жылдары ұлттық бастауларына қайта оралып, өз дінін, дәстүрін, тілін жаңғыртуға мүмкіндіктің негізі Конституцияда қаланғанын айтты. «Біз, ортақ тарихи тағдыр бiрiктiрген Қазақстан халқы, байырғы қазақ жерiнде мемлекеттiлiк құра отырып, жоғары жауапкершiлiгiмiздi сезiне отырып, өзiмiздiң егемендiк құқығымызды негiзге ала отырып осы Конституцияны қабылдаймыз» деген еліміздің басты Заңының алғашқы сөздерін баса айтқым келеді. Расында да, біздер адам және адамның өмiрi, құқықтары мен бостандықтарын ұлықтай отырып, зайырлы, құқықтық және әлеуметтiк мемлекет ретiнде қалыптастық» деді.
Жиын барысында қалалық этномәдени орталықтарының өкілдерімен қатар, кәсіби медиаторлар да қатысып, пікір алысты.
Айгүл УАЙСОВА