Заңсыз тексеруге жол берілмейді
«Қазақстан Республикасының Кәсіпкерлік кодексі» талаптарына сай бизнес субъектілерін тексеру белгіленген заң негізінде жүзеге асырылады. Кәсіпкерлерді тексерушілердің тиісті құжаттары болуы керек.
ҚР Кәсіпкерлік кодексінің 145-бабына сай тексеру мемлекеттік органның тексеруді тағайындау туралы актісі негізінде жүзеге асырылады. Тексеруді тағайындау туралы актіде оның нөмірі мен күні, мемлекеттік органның атауы, тексеру жүргізуге уәкілеттік берілген адамның тегі, аты, әкесінің аты (егер ол жеке басын куәландыратын құжатта көрсетілмесе) және лауазымы, тексеру үшін тартылатын мамандар, консультанттар және сарапшылар туралы мәліметтер, тексерілетін субъектінің атауы немесе өзіне қатысты тексеру жүргізу тағайындалған жеке тұлғаның тегі, аты, әкесінің аты, оның тұрған жері, сәйкестендіру нөмірі, аумағының учаскесі көрсетіледі.
Заңды тұлғаның филиалын немесе өкілдігін тексерген жағдайда тексеру туралы актіде оның атауы, тұрған жері көрсетіледі, сондай-ақ, тағайындалған тексерудің мақсаты, тексеру жүргізу мерзімі, тексеру жүргізудің құқықтық негіздері, кезеңі, актіге қол қоюға уәкілеттілік берілген адамның қолы және мемлекеттік органның мөрі де берілуі тиіс.
Кодекстің осы талаптары кәсіпкерді тексеруші келгенде бағдар ретінде қолдануға мүмкіндік береді. Есіл аудандық прокуратурасы уәкілетті органдармен бірге кәсіпкерлерді заңсыз тексерудің алдын алу және кәсіпкерлердің құқығын қорғау мақсатында күнделікті жедел топпен жұмыс жүргізеді. Прокуратураның «сенім телефоны» 71-20-82, 71-20-83, 8 747 053 29 37. Мекенжайы: Астана қаласы, Қабанбай батыр даңғылы, 31.
Меңдолла ШАМҰРАТОВ