Egov-та бір ЖСН бойынша тіркелген ұялы телефон нөмірлерінің санын тексеруге арналған жаңа қызмет қосылды. Бұл туралы Цифрлық даму, инновациялар және аэроғарыш өнеркәсібі министрі Жаслан Мәдиев мәлім етті, деп хабарлайды astana-akshamy.kz
Оның айтуынша, бұл мүмкіндік SIM-картаны заңсыз тіркеу іс-қимылдарымен күресуге жағдай жасайды.
— Осы тұрғыда eGov-та нақты ЖСН бойынша SIM-карталар санын тіркеуді тексерудің жаңа қызметі іске қосылғанын хабарлаймын. Сондықтан енді eGov жүйесінде өзіңіздің ЖСН-ді енгізу арқылы атыңызға неше ұялы телефон нөмірі тіркелгенін оңай тексеруге болады. Егер нақты пайдаланып отырған нөмірлер бойынша сәйкессіздік болса, онда ұялы байланыс операторына дереу хабарласып, қалғандарын бұғаттай аласыз, – деді ведомство басшысы Парламент Мәжілісінде тілшілер сұрағына жауап бере отырып.
Бұдан бұрын хабарланғандай, бүгін Мәжіліс Astana Hub пен Инновациялық технологиялар паркін біріктіру туралы заң жобасын бірінші оқылымда мақұлдады.
