Кеше Астана қаласының әкімі Әділбек Жақсыбеков бір ауысымда 500 адам қабылдай алатын жаңа амбулаториялық-емхана кешенінің ашылу салтанатына қатысты деп хабарлады қалалық әкімдіктің баспасөз қызметі. Осынау №9 қалалық емхана ҚР Денсаулық сақтауды дамытудың «Саламатты Қазақстан» мемлекеттік бағдарламасын іске асыру аясында салынды.
Кешен құрамына консультативтік-диагностикалық бөлім, жалпы тәжірибе, профилактика және әлеуметтік-психологиялық көмек көрсету бөлімі, 20 орындық күндізгі стационар және амбулаториялық хирургия орталығы кіреді. Астананың сол жағалауынан орын тепкен емхана 80 мыңнан аса тұрғынға қызмет көрсетпек. Ғимарат халықаралық стандарт талаптарына сай келетін заманауи медициналық қондырғылармен жабдықталған. Сәулелі диагностика жасауға арналған аппаратура, ауруды ультрадыбыстық зерттеу жабдығы, балалар мен ересектердің сырқатын анықтайтын бейнеэндоскопиялық аппаратура бар. Сонымен қатар, ЛОР дәрігер, офтальмолог және басқа да мамандандырылған кабинеттер ашылды. Жаңа нысан Орынбор көшесіндегі 16/1-үйде орналасқан.
Сондай-ақ, қала басшысы әкімдіктің «Онкологиялық орталық» шаруашылық жүргізу құқығындағы мемлекеттік қазыналық кәсіпорын базасындағы жаңа медициналық кластердің таныстырылымына қатысты. Мекемеде «VARIAN» (АҚШ) шығарған «TRUEBEAM» жоғары энергетикалық желілік жылдамдатқыш қолданысқа енгізіледі. Желілік жылдамдатқыш қатерлі ісіктің барлық түрлерін
заманауи техниканы пайдалана отырып, сәулемен емдеуге мүмкіндік береді.
