ЖАҢА АВТОБУСТАР ЖОЛҒА ШЫҚТЫ
Қараша айының соңында қоғамдық көліктердің жұмысындағы кемшіліктер туралы қала тұрғындары тарапынан келіп түскен шағымдардың көптігіне байланысты елорда әкімі Әділбек Жақсыбеков жолаушылары көп бағыттарға 36 жаңа автобус шығаруды тапсырған еді. Соның нәтижесінде кеше Астанада № 9, 10 бағыттары бойынша қатынайтын жаңа автобустар көпшілікке таныстырылды.
Елорда әкімі Әділбек Жақсыбеков жаңа автобустардың техникалық сипаттамаларымен танысып, олардың мүмкіндігі шектеулі жандарды тасымалдауға арналған едендерінің төмендігімен ерекшеленетініне көз жеткізді. Пандусты көліктер көпшіліктің көңілінен шығары сөзсіз.
Автобустар аяқасты ауа райының құбылуына бейімделіп жасалған. Яғни, терезелері 3 қабат шыныдан тұрады. Ауа айналымын реттеу және жылыту жүйелері орнатылып, едендеріне арнайы жабын төселген. Сонымен қатар, жаңа автобустарда бейнебақылау, WI-FI, валидатор және жолаушыларды ақпараттандыру жүйесі де қарастырылған. Әрқайсысы шамамен 270 мың АҚШ долларын құрайтын,
заманауи техникамен жабдықталған Франциядан әкелінген 24 орындық жаңа көліктердің ішіне жетпіске жуық жолаушы емін-еркін сыяды.
Сонымен қатар, жолаушылардың қауіпсіздігіне алаңдаған қала басшылары мен автопарк өкілдері жүргізушілер мен кондукторларды арнайы орталықта алдын ала оқытқан. Алайда, келер жылдың наурызынан бастап кондукторлардың орнын олардың электронды нұсқасы алмастырмақшы. Жолақысы 90 теңге күйінде қалады. Енді 28 және 42 бағыттарына қатынайтын тағы 80 автобус жыл соңына дейін пайдалануға беріледі деп күтілуде.
Астанада күн сайын шамамен 720 мың жолаушы қоғамдық көлік қызметін пайдаланады екен. Алдағы уақытта тасымалдаушылар жолаушылар ағынын
әлде де ұлғайтпақ ниетте. Бұл жұмыстың басты компоненттерінің бірі автобустар паркін жаңарту және ұлғайту болмақ.
Нұрислам ҚҰСПАНҒАЛИ