Мөлдір МЫРЗАҚАСЫМОВА,
«Kazakh TV» арнасының продюсері:
– Мөлдір Қуандыққызы, 2002 жылдың 25 қазанында «Хабар» агенттігі жанынан «Caspionet» телеарнасы ашылды. Былтырдан бері «Kazakh TV» болып өзгерген телеарнаның туған күні құтты болсын! Арнаның бүгінгі тыныс-тіршілігі қандай?
– Иә, әлемнің 100-ге жуық елінде 800 миллионнан астам көрермені бар Қазақстанның тұңғыш спутниктік телеарнасы 10 жылдан астам уақыт эфирде. Өткен жылдың 1 қыркүйегінен бастап «Kazakh TV» болып өзгертілген телеарна бүгінгі ақпарат кеңістігінде өзінің көзқарасын айқындап, тәуелсіз елімізді шетелге насихаттауда, жағымды имиджін қалыптастыруға еселі еңбек етуде.
– Бағдарламалар өндірісі бөлімінің продюсерісіз. Жаңа маусымдағы жаңалықтармен бөліссеңіз…
– Жаңа маусымда көрермен назарына ондаған жаңа тележобалар ұсынамыз. Нақтырақ айтсам, «Central Asian: report» – ақпараттық-сараптамалық жоба. Бұл Орта Азия аймағындағы бір апта ішінде орын алған маңызды оқиғаларға шолу. «Kazakhstan: International Vectors» – Қазақстан әлемдік саяси алаңда, көпсалалы сыртқы саяси бағыттың жетістіктері, «EXPO 2017» – әлемдегі ең беделді көрмелердің бірін лайықты қабылдауға Қазақстанның әзірлігі жөнінде апта сайынғы есеп. «Discovering Kazakhstan» – көлемі бойынша әлемде 9-орында тұрған мемлекеттің шексіз даласын шетелдік журналист аралайды. Айшықты әсерлерімен, көзқарасымен бөліседі. «Әдебиет әлемі» атты жаңа жобада отандық ақын-жазушылардың шығармашылығын насихаттаймыз. Қазақ тіліндегі тағы бір төл бағдарлама – «Ұлттық Энциклопедия». Аталмыш хабарда халқымыздың салт-санасы, дәстүрі терең қозғалып, ұлтымыздың тек өзіне ғана тән құндылықтар туралы айтылады. Біздің елдің тарихи-мәдени мұрасы мен өркениеттер құпиясын «Heritage» жобасынан көрсетеміз. Ал «Kazakhstan in Fates» – қазақ жеріне табаны тиіп, осы киелі мекеннен ұлы істерге шабыт алған, әлем тарихында айрықша орын алған адамдар туралы бағдарлама. Сонымен қатар, шетелде бірнеше жыл тұрып елге қайта оралғандар – «East Or West Home Is Best» жобасының кейіпкерлері бола алады. Республиканың көпұлтты қоғамы туралы «Акцент» бағдарламасы, ғылымдағы жетістіктер туралы «Infinite Science» жобасы ашылып отыр. «Astana – Сity Of The World» жобасы арқылы көрермен сәулет өнерінің алдыңғы қатарлы және айрықша үлгілерімен, елорданың қайталанбас әсем бейнесімен танысса, «Travel Guide» бағдарламасынан Қазақстанның кең байтақ жері туралы мағлұмат алуға болады. Жалпы, жаңа маусымда көрерменді қуантар осындай дүниелеріміз бар.
– Шынында қызықты жаңа жобалар көп екен. Жалпы, «Хабар» агенттігі «Euronews Network» бірлестігінің құрамына кіргенін білеміз. Бұл байланыстың салмағы қандай?
– Биыл жаз айында Париж қаласында тәулік бойы хабар тарататын ақпараттық «Euronews» арнасының атқарушы кеңес төрағасы Майкл Питерс, «Хабар» агенттігінің басқарма төрағасы Айдос Үкібаев және «Kazakh TV» телеарнасының директоры Аниса Бердина «Хабар» агенттігінің «Euronews Network» бірлестігінің құрамына кіру туралы екіжақты келісімге қол қойды. Халықаралық ақпарат кеңістігінде «Euronews» телевизиялық холдингімен ынтымақтастық орнатуға мүдделілік таныту – уақыт талабы. «Euronews» үшін Қазақстан мен Орталық Азияның сапалы ТВ-контенті тартымды болып тұр. Сондықтан еуропалық әріптестеріміз өзара ынтымақтастық туралы бастаманы ықыласпен қабыл алғанын айтқым келеді.
– Аталмыш келісім қандай мүмкіндіктерге жол ашады?
– «Euronews» – 13 тілде әлемдік оқиғалардың бейне хроникасын және аудио-түсініктемелерді біріктіретін, тәулік бойы хабар тарататын ақпараттық телеарна.
Оның кабельдік, спутниктік және эфирлік хабар таратуы әлемнің 150-ден астам елінде 350 миллион үйді қамтиды. Осы келісім нәтижесінде «Euronews»-тің кәсіби командасы дайындаған жаңалықтар контентін, түрлі тақырыпты қамтитын сапалы материалдарын пайдалануға мүмкіндігіміз мол.
Тағы бір айтарым, «Kazakh TV» телеарнасының журналистері енді «Euronews» үшін материалдар дайындап жүр. Мәселен, жуырдағана «Euronews» телеарнасынан елордада ашылған «Астана Опера» мемлекеттік опера және балет театры туралы сюжет берілді.
– «Kazakh TV» әлемге тарайтын арна. Шетелдегі қазақтармен байланыс қаншалықты жолға қойылған?
– Әрине, бүгінгі таңда әлемнің 35 елінде төрт миллионнан артық қандастарымыз тұрады ғой. Алыстағы ағайынмен біз үнемі байланыстамыз, жаңа бағдарламалар туралы олардың пікірлерін біліп, ұсыныстарын қабылдап, хат жазысамыз. Жырақта жүрген қандастарымыздың тыныс-тіршілігі туралы баяндайтын «Ағайын» атты бағдарламамыз бар.
Гүлмира АЙМАҒАНБЕТ
