ЖАҢА ӨНДІРІС ЖЕЛІСІ
Л.Н.Гумилев атындағы Еуразия ұлттық университеті жаратылыстану факультетінің химия кафедрасының профессоры Ирина Иргибаеваның жетекшілігімен жасалған «Отандық флуоресцивті полимер материалдардың технологиясын жасау және тәжірибелі өндірісті ұйымдастыру» атты ғылыми жоба ҚР Білім және ғылым министрлігінің және Бүкіләлемдік Банктің «Технологиялардың коммерциялануы» жобасы негізінде аға ғылыми қызметкерлер топтары бағдарламасы бойынша грант иеленуге мақұлдау алды.
Осы жобаны жүзеге асыру мақсатында ҚР Білім және ғылым министрлігі жанынан құрылған Жобаның басқарма тобының жетекшілігімен «Люминесцентті материалдарды зерттеу орталығы» ЖШС құрылды. Жаңа өндірістің негізгі мақсаты отандық шикізат ресурстарын, оның ішінде қолданыстағы химия өнеркәсібін мақсатты әрі тиімді пайдалану болып отыр. Негізгі өнімдер жол және навигациялық белгілерді, көліктердің, жол жұмысшыларының маркировкасын және жол жолақтарын бояуға арналып шығарылатын болады. Қазіргі кезде жобаға қатысушылар флуоресцивті полимер материалдың (смола) негізін өндіретін айрықша технологияны жасап қойды. Бұл технология техникалық және экономикалық жағынан тиімді, сонымен қатар экологиялық тұрғыдан зиянсыз болатыны болжанып отыр. Жобаның жүзеге асуы қазақстандық өндірістің іске қосылуымен, бәсекелестіктің дамуымен, сонымен қатар қосымша жұмыс орындарының ашылуымен нәтижелі болмақ.
Жобаның негізгі жасаушылары И.С.Иргибаева, Н.Н.Барашков, З.Г.Акулова, Т.Н.Нұрахметов, А.А.Алдоңғаров және А.И.Мантель өздерінің ғылыми еңбектері енді өндіріске қосылатынын, әрине, мақтан тұтады.
Осылайша, ҚР Білім және ғылым министрлігі мен Бүкіләлемдік Банк бастамасымен жүзеге асырылып жатқан «Технологиялардың коммерциялануы» жобасы аясында жаңа өндіріс іске қосылмақ.
И. Иргибаева,
Л.Н. Гумилев атындағы Еуразия ұлттық университетінің профессоры, химия ғылымдарының докторы