Жаңа жыл жыры
Мереке қарсаңында астаналық балалар Елбасының жаңажылдық тосын сыйына ие болды.
Астана қаласындағы Оқушылар сарайында өткен Президент шыршасында ата-анасының қамқорлығынан айырылған, көп балалы отбасынан шыққан, балалар үйінде тәрбиеленетін және ең дарынды 150 елордалық балаға Қазақстан Республикасы Президентінің атынан құны 75 мың теңге болатын мерекелік сыйлықтар жиынтығы тапсырылды.
Сый-қораптың ішінде ойыншық, тәттілермен қоса соңғы үлгідегі планшет те бар болып шықты. Балалардың өз қалауы бойынша дайындалған бұл сыйлық олардың төбесін көкке жеткізді.
Ал, өзінің балаларға деген ақ тілегін Елбасы бейнеэкран арқылы жолдады.
«Бүгін байтақ еліміздің барлық өңірінде өнерлі балалар жаңажылдық шыршаның айналасына жиналды. Жаңа жыл – ең алдымен балаларға қуаныш сыйлайтын мереке. Мен сендер арқылы барша қазақстандық балаларды келе жатқан Жаңа жыл мерекесімен құттықтаймын» деді Президент.
Еліміздегі интеллектуалды мектептердің, әлемдік деңгейдегі жоғары оқу орындарының ашылуы балалардың жарқын болашағы үшін жасалып жатқан жасампаз еңбек екендігін айтты.
«Тәуелсіздік арқылы біздің ұлы отанымыз жылдан-жылға өркендей түсуде. Қазір дүниежүзі қазақ елін құрметтейді. Сендер осындай ерекше елде өсіп келе жатқан бақытты ұрпақсыңдар. Ата-аналарыңды қуантыңдар. Зерделі де зерек, білімді де білікті болып өсіңдер. «Өнер білімнің – кені, өркенді елдің теңі болыңдар» деп тіледі.
Шырайын бермейтін жасыл шыршадай жайнап өсулеріне тілектестігін білдірді.
Астана қаласы Білім басқармасының бастығы Әсима Бимендина өз сөзінде 2012 жылдың барша қазақ халқы үшін ерекше оқиғаларға толы болғандығын айтады. Әсіресе, жыл аяқталар тұста Президент Нұрсұлтан Назарбаевтың 2050 жылға дейінгі ұзақ мерзімді стратегиясының жариялануы келер жылды жаңа жоспармен, тың идея-лармен бастауға серпін бергенін атап өтті.
Жаңажылдық қойылым «Қазақстанның жұлдызды қадамдары» деген тақырыппен өрбіді. Әрбір сахналық көрініс еліміздің тәуелсіздік жылдары қол жеткізген жетістіктерін суреттеді. Балғындар ертегі кейіпкерлерімен бірге тәуелсіз Қазақстанның өткені мен келешегіне саяхат жасады. Сонау мұхит асып жеткен кейіпкер – әйгілі жаһанкез Христофор Колумб бейбіт аспан астында ғұмыр кешіп жатқан қазақстандық балалардың әлемдегі ең бақытты балалар екеніне күмән келтірмейтінін айтты. Осылайша, балалар жаңажылдық шырша маңынан ертегі кейіпкерлерімен қатар тарихи тұлғаларды да жолықтырды. Бұдан бөлек, ән айтылды, би биленді, мерекелік дастархан жайылды.
Жаңажылдық шараға эстрада жұлдызы Бақыт Шадаева мен бокстан Олимпиада ойындарының чемпионы Серік Сәпиев те арнайы келіп, балаларға мерекелік тілегін білдірді.
Шынар ДОСАН