Елордада жүгіруден Триатлон саябағында отбасылық эстафета ұйымдастырылды.
Іс-шара таңғы жаттығумен басталып, қатысушылар жарақат алып қалмау мақсатында денелерін қыздырды. Артынша бәсекені әкелер бастап, 2,3 шақырым қашықтықта сынға түсті. Бұдан кейін арнайы лента анасы және баласына беріліп, бір отбасы толық 3 шақырымды жүгіріп өтті. Осылайша жүгіруге қатысқан отбасылардың құрамында әкесі 2,3 шақырым, анасы 0,5 шақырым, баласы 0,2 шақырым қашықтықты бағындырды.
«Астана қаласындағы бұқаралық сипатқа ие болған спорт түрі – жүгіру. 2024 жылы 40-қа жуық жүгіріс ұйымдастырылды. Ал отбасылық эстафетаны желтоқсан айында екінші рет өткіздік. 50-ге жуық отбасының қатысуын жақсы көрсеткіш деп айтар едім. Салауатты өмір салтын ұстану арқасында келешекте спортқа жақын, тәні сау жастар қалыптасады» деді Астана қаласы әкімдігі спорттық-бұқаралық іс-шараларды өткізу дирекциясы спорттық-бұқаралық іс-шараларды жоспарлау бөлімінің басшысы Көлбай Жанбек.
Балалар арасындағы бәсекеде жеңіске жету мүмкіндігі бірдей болу үшін балалар 8-9, 10-11, 12-13 жас санатына бөлінді. Қатысушылар жаңа жыл қарсаңында өтіп жатқан жарыс туралы өз эмоциясын жасыра алмады.
«2019 жылдан бері жүгірумен тұрақты түрде айналысамын. Бастапқыда өзім, артынша отбасымды да спортқа баулыдым. Жалпы қай жерде болсам да, спорт шараларын жібермеуге тырысамын. Салауатты өмір салтын ұстанудың арқасында артық салмақтан арылып, өзімді жақсы сезінемін. Қазақстандағы барлық ірі марафонға қатыстым. Енді әлемдік мейджорларды көздеймін. Отбасыма өзім үлгі болсам деймін» деді Марғұлан Ермағанбетұлы.
Нәтижесінде 8-9 жас аралығы бойынша бірінші орынды Тайтілеуовтер отбасы жеңіп алды. Ал екінші орын Бондаренко отбасына, үшінші орын Кульбаба отбасына бұйырды. 10-11 жас бойынша бірінші орынды Карначевтер отбасы, екінші орынды Габдуллиндар, үшінші орынды Аманбековтер отбасы жеңіп алды. 12-13 жас бойынша бірінші орынды Шахметовтер иеленсе, екінші орынды Бахрушевтер, үшінші орынды Ережеповтер отбасы жеңіп алды. Жарыс соңында I, II, III орын алған отбасылар теледидар, планшет, смартфон сынды бағалы сыйлықтармен марапатталып, барлық қатысушы естелік медальға ие болды.
Шапағат ӘБДІР
