ЖАҢАРТЫЛҒАН КУӘЛІКТЕР БЕРІЛДІ
Таяуда елордада «Болашақ мектебі – бүгін» жүйесіне қатысушы мектептердің отыз бес мың оқушысына жаңартылған куәліктер берілді.
Енді оқушылар арнаулы куәліктермен мектептерге, Оқушылар сарайына, спорттық мекемелерге, үйірмелерге және басқа да жерлерге автоматты түрде кіре алады. Сонымен қатар, мектеп және қала кітапханаларына тіркеліп, кітаптар алады, сондай-ақ, асханаларда есеп айырысады.
Болашақта осы карточкамен қоғамдық көлікте ақшасыз төлем жасау көзделген. Сондай-ақ, жоба аясында мектептерде бейнебақылау жүйелері орнатылмақ.
Қазіргі кезде «Болашақ мектебі – бүгін» жобасына Астананың 17 мектебі қатысуда, 2017 жылға қарай осы жүйеге қаланың барлық мектебін кезең-кезеңмен қосу жоспарланған.
2014 жылы ата-аналар үшін балалардың қауіпсіздігін қамтамасыз ету бойынша қосымша ақылы қызметтер ұсыну арқылы жобаны коммерцияландыру шаралары қолға алынды.
Ақылы қызметтерге ата-аналарды оқушылардың қозғалысы туралы СМС-хабарлама арқылы (мектепке, спорттық ғимараттарға, оқушылар сарайына және басқа да демалыс орындарына, қосымша сабақтарға баруы туралы) ақпараттандыру жатады.
Жобаның тиімділігінің негізгі факторлары: мектептерге бөгде адамдардың кіруін болдырмау және қалалық мектептерде бейнебақылау жүргізу арқылы лаңкестікке қарсы қорғанысты күшейту; ата-аналардың және білім мекемелерінің оқушылардың сабаққа қатысуын бақылауын автоматтандыру; мектеп және қалалық кітапханаларда кітапханалық іс жүргізуді автоматтандыру; жабдықтаушылардың мектепте тамақтану қызметтерін ұсынуының сапасын бақылау; қоғамдық көлікте оқушылардың жолақы төлеуін автоматтандыру; оқушылардан ақша бопсалау жағдайларын болдырмау; Білім басқармасына оқушылардың сабаққа қатысуы мен кітапхана қорын пайдалану бойынша есеп беруді автоматтандыру.