2011-2020 жылдарға арналған «Тұрғын үй-коммуналдық шаруашылығын жаңғырту» бағдарламасы бойынша тұрғын үйлерді күрделі жөндеуден өткізуге болады. Осы бағдарлама жөнінде Астана қаласы Тұрғын үй инспекциясы басқармасы заң және құжаттамалық қамтамасыз ету бөлімі, персоналды басқару қызметінің бөлім басшысының міндетін атқарушы Ринат Сағынаевтан сұрап білген едік.
– Бұл бағдарламаға қатысу үшін тұрғын үй иелеріне қандай талаптар қойылады?
– Бағдарлама шартына сәйкес тұрғындар қайтарымдық негізде бюджеттік қаржы есебінен үйлеріне күрделі жөндеу жүргізе алады. Бағдарламаға қатысу үшін, біріншіден, тұрғын үй кондоминиумы нысанын әділет органдарында тіркеу керек. Екіншіден, тұрғын үйдің кондоминиум нысанының басқару органын таңдау керек (ПИК, басқарушы компания және т.б.). Сондай-ақ, пәтер иелерімен жалпы жиналыс өткізіп, бағдарламаға қатысу үшін тұрғындардың кем дегенде
66,7%-ының келісімін алу қажет.
– Алдағы уақытта қанша үйге жөндеу жүргізілмек?
– Қазіргі уақытта ТКШ жаңғырту бағдарламасы аясында елордада 20 көп пәтерлі тұрғын үйге күрделі жөндеу жүргізілді. Соның ішінде 12 үй – Алматы ауданында, 8-і Сарыарқа ауданында орналасқан. Жалпы, пәтерлер саны 1713-ті құрайды.
Бүгінгі таңда 2015 жылға арналған бағдарламаға қатысушылардың тізімі жасалуда. Астанада 31 тұрғын үй жалпы кондоминиум мүлкіне күрделі жөндеу жүргізу тізіміне енгізіліп қойды.
– Бағдарлама көлемінде тағы қандай жеңілдіктер қарастырылған?
– Бұл бағдарламаның өзі – жеңілдік.
Ал, тұрмысы төмен отбасыларға жергілікті бюджет есебінен тұрғын үй жөндеуге кеткен шығындарын төлеуге көмек көрсетіледі. Бұл туралы толық ақпаратты қала тұрғындарының тікелей біздің мекемеден алуына болады.
Нұрислам ҚҰСПАНҒАЛИ
