Жәрмеңке жалғасады
Таяуда Астана қаласы әкімдігінің қолдауымен қам көңілді бүлдіршіндерге қамқор болуды көздеп, Алматы, Қарағанды және Шымкент қалаларынан келген 40 кәсіпкер орталық алаңдағы мектеп жәрмеңкесіне қатысты.
Онда мектеп формасына 50 пайыз, ал, аяқ киімдер, кеңсе заттары, рюкзактар, оқулықтар мен басқа да мектеп жабдықтарына 10-25 пайыз жеңілдіктер жасалып, өрендерге қажетті өнімдердің барлығы қолжетімді бағамен сатылды.
Ұйымдастырушылар шара барысында Оқушылар сарайы мен балалар үйі оқушыларының қатысуымен шағын концерт өткізуді де ескерген. Сондай-ақ, тұтынушылар үшін төрт қоғамдық тамақтану орнын ашып қоюды жөн санапты.
Балалардың құқықтарын қорғау басқармасының бас маманы Салтанат Басығараеваның айтуынша, акция аясында халыққа заң кеңестерін беретін қоғамдық қабылдаулар да жұмыс істеп жатыр. Мұндай мүмкіндікті кеш естігендерге өкінбесе де болады. Мектеп жәрмеңкесінің келесі кезегі тамыздың 30-ына келіп тұрғандықтан, енді содан кешікпеулері керек-ақ.
Еркежан СӘТІМБЕК