Жәрмеңке жұмыс ұсынады
Астана қаласы әкімдігінің Жұмыспен қамту орталығы бос жұмыс орындары жәрмеңкесін ұйымдастырды.
«Сапаржай» автобекеті ғимаратында өткен бұл шараға «Астана Су арнасы» МҚК, «Алма ТВ» ЖШС, «Астана көгалдандыру құрылысы» АҚ, «СМЭУ Астана» ЖШС, Астана қаласының Ішкі істер департаменті және басқа да елорданың жиырмаға тарта кәсіпорны қатысты.
Жәрмеңке кезінде азаматтарға 200-ден астам жұмыс орны ұсынылды. Олардың арасында сатушы менеджер, жүргізуші, бағдарламашы және ІТ маманы, тігінші-оператор, құрылысшы және басқа да мамандықтар бойынша әртүрлі деңгейдегі қызметтер бар еді.
Әдеттегідей, бос жұмыс орындары жәрмеңкесіне қала тұрғындары көп жиналды. Олардың біразы «Жұмыспен қамту – 2020» жол картасына қатысу мәселелері жөнінде кеңес алса, 136 адам жұмыс берушімен бетпе-бет әңгімелесу мүмкіндігіне қол жеткізді. Ал, тағы 81 азамат жастар практикасына және әлеуметтік жұмыс орындарына жұмысқа орналасуға қатысты ақпарат алып, жүздеген адам кәсіптік оқыту мәселесі бойынша өздерін қызықтырған сауалдарға жауап тауып қайтты.
Нәзира САЙЛАУҚЫЗЫ