Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің Астана қаласы бойынша аумақтық инспекция ұжымы Мемлекет басшысы Нұрсұлтан Назарбаевтың «Қазақстан жолы – 2050: бір мақсат, бір мүдде, бір болашақ» Жолдауын талқылады.
Аталған мекеменің бас маманы Қали Қамбарбек өз баяндамасында әріптестерінің назарын Елбасының агроөнеркәсіптік кешенді дамыту туралы айтқандарына аударды. Әсіресе, озық технологияларды енгізу, өнімділікті арттыру, сала жұмысын әлемдік стандарттарға негіздеу тармақтарына мән берілді. Сондай-ақ, ол Ауыл шаруашылық жерлеріне инвестиция тарту маңыздылығына тоқталды.
Сонымен бірге талқылау барысында ет және сүт экспорты туралы айтылды. «Жасыл экономикаға» көшу жөніндегі тұжырымдамаға сәйкес егіс алқаптарының 15 пайызын суды үнемдеу технологиясына көшіру жайы қозғалды. Мемлекет басшысының қойған мақсаты – аграрлық ғылымды дамыту, сол арқылы сынақтық аграрлық-инновациялық кластерлерді құру қажеттілігі атап өтілді.
Елбасының мемлекеттік тіл туралы айтқанына ризашылық білдіріліп, «Мәңгілік Ел» идеясы кеңінен қолдау тапты.
Мемлекет басшысының Жолдауы елдің өркендеуіне ықпал ететіндігі, билік пен халықты бір мақсат-мүддеге жұмылдыратыны, отандастарымыздың әл-ауқатын жақсартуға, әлеуетін көтеруге бағытталғаны, жалпы қоғам мен мемлекет дамуында зор рөл атқаратыны айтылды.
Аманғали ШМИТҰЛЫ
