Елорда төрінде бокстан жасөспірімдер арасында республикалық жарыс өтті.
Астана қаласының №3 Олимпиадалық резервтегі мамандандырылған балалар мен жасөспірімдер спорт мектебі ұйымдастырған дәстүрлі турнирге Ақмола, Ақтөбе, Атырау, Жамбыл, Оңтүстік Қазақстан, Шығыс Қазақстан облыстарының және Астана қаласының командалары қатысты. Төрт күнге жалғасқан жарыста 120 боксшы шаршы алаңға шықты.
– Бұл жарыс биыл екінші рет өтіп отыр. Астанадағы №3 спорт мектебінің директоры Мұрат Мұстафиннің бастамасымен өткізіліп келе жатқан турнирге қатысушылар қатары жыл сайын көбейіп келеді. Халықаралық сайыстарда ел намысын қорғайтын спортшылар осындай жарыстарда шыңдалады, – дейді турнирдің бас төрешісі, АИБА-ның халықаралық дәрежедегі төрешісі, Ауғанстан соғысының ардагері Ерболат Әшімов.
Жарыс қорытындысы бойынша командалық бірінші орынға Астана қаласының жас боксшылары ие болды. Ақтөбе және Оңтүстік Қазақстан облыстарының спортшылары екінші және үшінші орыннан көрінді. Төрешілер ұйғарымымен астаналық бапкер Иса Кенжеғұловтың шәкірті Сәбит Қайнар «Үздік боксшы» атанса, Қазақстанның еңбек сіңірген жатықтырушысы Мәулет Мұстафиннің шәкірті Сырым Тимкен «Үздік техникалық шеберлігі үшін» сыйлығына ие болды. «Жеңіске деген жігері үшін» сыйлығы ақтөбелік Диас Қарабаевқа берілді. Сондай-ақ, осы жарысқа Астана қаласының «Ауғанстан соғысы мүгедектері мен ардагерлері одағы» қоғамдық бірлестігі де арнайы сыйлықтар тағайындапты. Бірлестік төрағасы жарысқа қатысқан барлық командалардың өкілдеріне естелік сыйлықтар табыс етті.
Осы жарыстың негізгі ұйымдастырушысы Астана қаласының №3 Олимпиадалық резервтегі мамандандырылған балалар мен жасөспірімдер спорт мектебінің директоры Мұрат Мұстафин турнирге қатысушы командалардың жетекшілеріне және жүлдегер атанған спортшыларға алғысын білдірді.
Ғалым ҚОЖАБЕКОВ
