«ЖАС ОТАН» — ЖАҢА БЕЛЕСТЕ
Кеше Астанадағы «Сарыарқа» велотрегінде «Нұр Отан» халықтық-демократиялық партиясы «Жас Отан» жастар қанатының екінші съезі өтті. Оған Елбасы Нұрсұлтан Назарбаев қатысып, сөз сөйледі.
«Арман! Еңбек! Сенім!» деген ұранмен өткен айтулы форум – тек «Жас Отан» мүшелері үшін ғана емес, күллі қазақстандық жастар үшін маңызды оқиға. Өйткені, съезд еліміздің жастар саясатын дамытуға жаңа серпін беретініне өрендер кәміл сеніп отыр.
Алқалы жиынды ашқан Елбасы, «Нұр Отан» ХДП-ның төрағасы Нұрсұлтан Назарбаев жастардың ел саясатын өркендетуге қосып жатқан үлесі жөнінде айта келе, оларға мемлекет айрықша қамқорлық көрсетіп, қандай істе де қолдау білдіріп отырғанын атап өтті. Елімізде қолға алынған «Болашақ», «Жасыл ел», «Дипломмен – ауылға», «Жастардың кадрлық резерві» сынды бағдарламалар – соның куәсі.
– Соңғы жеті жыл ішінде жастар саясатындағы жобаларды қаржыландыру 10 есеге өсті. Тек биылдың өзінде жас мамандардың баспаналы болуына және оларды қолдауға 12 миллиард теңге жұмсалды. 2020 жылға дейін жас отбасыларға арнап, 1 млн 200 мың шаршы метр тұрғын үй салуды тапсырдым. Бұл – құрғақ цифрлар емес. Әр көрсеткіштің артында орасан еңбек, сендерге деген мемлекеттің қолдауы, сенімі жатыр, – деді Президент.
Тәуелсіздіктің алғашқы жылдарында елдің басына түскен күрделі кезеңді бір шолып өткен Елбасы сенім мен қажырлы еңбектің арқасында мемлекетіміз бүгінгідей іргелі елге айналғанын атап өтті.
– Тынымсыз еңбектің арқасында біз кім болдық? Адам басына шаққандағы жалпы ішкі өніміміз 16 есе өсіп, әр адамға шаққанда 12 мың долларға жетті, – деді ол. – Қай кезде қазақ мұны армандап еді?! Алланың берген байлығы бар. Ол бізге қажет. Бірақ, бір күні ол да таусылады. Бар күш-жігерімізді индустриалдық дамуға салып жатқанымыз да сондықтан. Қазіргі күні индустриалдық картасының аясында 10 триллион теңге тұратын 600-ден астам жоба жүзеге асырылып жатыр. Бұл – жастар үшін 370 мың жаңа жұмыс орны ашылады деген сөз.
Президент жастарды қолдауға арналған тағы көптеген игі істер қолға алыну қажеттігін баса айтты. Мысалы, елімізде 11 жастар ұйымы жұмыс істейді. Олармен Үкімет, әрбір министрлік, әрбір ведомство тығыз қарым-қатынаста жұмыс істеуі қажет. Сонымен бірге «Жас Отан» өкілі үкіметтік емес ұйымдармен жұмыс кеңесінің құрамында болуы керектігін тілге тиек еткен Елбасы Үкіметке Жастар бастамасы қорын құру мәселесімен жұмыс істеуді тапсырды.
«Жас Отан» болашақ саясаткерлер үшін үлкен мектеп болып табылады. Сондықтан да, жасотандық депутаттарды билік органдарына, жергілікті мәслихаттарға, Парламент депутаттығына тарту маңызды болатынын да Президент атап көрсетті.
Сондай-ақ, болашақта Астанада заманауи Жастар сарайы бой көтеруі мүмкін. Мұны да Елбасының өзі ұсынды.
Елдің ең басты құндылығы Тәуелсіздік екендігіне айрықша назар аударған Мемлекет басшысы жастарды азат елдің қадірін түсінуге, бірлік пен тұтастықты сақтауға, білім мен ғылым үйренуге бар күш-жігерлерін салуға шақырды.
Осы съезде «Нұр Отан» ХДП жанындағы «Жас Отан» жастар қанатының атқарушы хатшысы болып сайланған Нұрлан Сыдықов көпшілікке «Жас Отан» жастар қанатының 2020 жылға дейінгі «Жастар – Отанға» стратегиясының мақсат-міндетімен таныстырды.
– Біз ашық аспан астында қанат керген қырандай еркіндікте өсіп жатқан жас ұрпақ Қазақстанның қазіргі гүлденуін, әлем алдындағы абыройлы болуын барлығын сізбен байланыстырамыз, құрметті Елбасы, – деп сөзін бастады жігерлі жас. – Арманның кілті – еңбекте. Жастарды еңбекке шақырған бағдарламалық мақалаңызда еңбектен қашпауға, маңдай термен жинаған ырысымызды шашпауға шақырдыңыз. Тәтті нанның ащы термен келетінін ұғындырдыңыз. Арман мен еңбек ұштаса келе, келешекке деген нық сенімді құрайды. Сол себепті де съездің басты ұстанымы – арман, еңбек, сенім.
Нұрлан Сыдықов таныстырған «Жастар – Отанға» 2020 жылға дейінгі стратегиясының жобасын еліміздің түкпір-түкпіріндегі жастар талқылапты. Оны оқыған әр жас ұсынысын айтып, пікірін білдірген. Демек, бұл құжат күллі қазақстандық жастардың үні іспеттес. Мұнда қолға алынатын шаруалардың 11 бағыты айшықталған. «Жас Отанның» жаңа стратегиясы – ұзақ мерзімді мақсат-міндеттерді жариялау ғана емес, елді дамыту саласындағы жастардың қосар үлесін айқындау.
Жиында сөз сөйлеген Солтүстік Қазақстан облысынан келген мұғалім Әлия Шарашеева елімізде қолға алынған «Дипломмен – ауылға» бағдарламасы ауыл үшін де, жастар үшін де пайдасы мол жоба болғанын атап өтті. Сонымен бірге, бағдарлама шеңберінде ауылға аттанған өзі сияқты жастар сол елдімекеннің гүлденуіне, әлеуметтік саласының дамуына айтарлықтай үлес қосып жатқанын жеткізді.
Ал, Шығыс Қазақстан облысынан келген жастар белсендісі Еркебұлан Балтабеков 1991 жылы жарты ғасырға жуық уақыт бойы сынақ алаңына айналған Семейде ядролық полигон жабылғанын айта келе, барша адамзат үшін мәні мен маңызы зор, еліміздің болашағы үшін Елбасының жасаған бұл шешіміне күллі семейліктердің атынан алғысын білдірді.
«Жас Отан» жастар қанатының екінші рет өтіп отырған съезінде жастар өткенді таразылап, болашаққа бағдар жасады. Бір-бірімен үндес, пікірлес жас қазақстандықтар Елбасының саясатын қолдайтындарын, өздеріне артылған сенімді ақтап, абыроймен еңбек етуге әзір екендіктерін жеткізді. Ал «Жас Отан» жастар қанатының атқарушы хатшысы болып бекітілген Нұрлан Сыдықов Президент тапсырған міндеттерді қалтқысыз орындап, жаңа стратегия қабылдаған «Жас Отанды» жаңа белеске көтеруге уәде етті.
Алқалы жиында «Жас Отанның» Орталық кеңесі сайланып, бұрынғы Жарғыға өзгертулер мен толықтырулар енгізілді.
Сонымен, бұл съезге қатысқан 9 мыңнан астам адам, еліміздің түкпір-түкпірінен келген 1100-ден астам делегат және жиынды тікелей эфир арқылы тамашалаған жамағат Қазақстанда жастар қозғалысы дамуының жаңа кезеңі басталғанына куә болды.
Қымбат ТОҚТАМҰРАТ