Жасампаз өнердің «Жас қанаты»
Бүгін – бәріміз асыға күткен 22-ші Республикалық «Жас қанат»-2013 жас орындаушылар байқауының нағыз тартысты кезеңі өтетін күн. Елорданың Бейбітшілік және келісім сарайында жалғасын тауып жатқан бұл дүбірлі доданы жылдағы дәстүр бойынша Мәдениет және ақпарат министрлігі, Астана қаласының әкімдігі және «Азия дауысы» дирекциясы ұйымдастырып отырғандығын ескерте кетейік.
Жалпы, Алматы қаласында 1992 жылдан бері өткізіліп келген жас таланттарға қолдау көрсететін мемлекеттік жоба 2001 жылдан бастап елорда төрінде жалғасуда. Оның алтын, күмiс, қола қанатының иегерлерi соңғы шешуші күні анықталып, Астана көгінде тағы үш өнерлі жұлдыз жарқырайтын болады. Қазір осы «Жас қанат» жеңімпаздарына керемет сый мүсінін жасап шыққан зергер де белгілі болды. Ол – Алматы қаласы Орал Таңсықбаев атындағы Республикалық сәндік-қолданбалы өнер колледжінің 3-курс студенті Айтжан Тұрлығазы деген азамат.
«Оқу үдерісі жүріп жатқан кезде маған «Жас қанат» жеңімпаздарына «Қанат» мүсінін жасау ұсынысы түскен болатын.
Бұл – республикалық жас орындаушылардың байқауы болғандықтан, мен де бір ірі жобаға өз үлесімді қосайын деп, бірден жұмысқа кірісіп кеттім. Сондықтан, ол мен үшін жауапкершілікті іс болды десем, қателеспеспін» дейді шебердің өзі.
Сонымен, маусымның 3-і күні бас қаламызда өтетін байқауға елдің әр аймағынан 15 үміткер келді. Келісімен бір-бірімен танысып, бағдарлама бойынша Астананың ең тамаша жерлерін аралап шықты. Жылдағы дәстүрге жүгініп, стилист, шаштараз және визажисттермен кездесті. Елорданың үздік шеберлері олардың алғашқы сахналық имидждерін қалыптастыру үшін белсенді түрде жұмыс жасады. Сол сәтте ұйымдастырушылар да жиналыс өткізіп, үміткерлердің әрқайсысымен шығармашылық жұмыс жасай бастады. Көп жылдар бойы байқаудың бас продюссері болып келе жатқан Мұрат Ерғалиев пен қоюшы режиссер Александр Пономарев жас орындаушыларға сахнада қалай жүріп-тұру керектігін түсіндіре отырып, бәрінің репертуарларын тексеріп көрді. Бұл жолы өз кеңестерін берсе, дайындық кезінде әр қатысушымен жеке жұмыс істейтіндіктерін ескертті.
Ал, маусымның 5-і күні «Думан» ойын-сауық орталығында жеребе тарту рәсімі өтіп, әр қатысушы өзінің концерттегі реттік санын білді. Одан кейін, Астанада болғандарын есте қалдыру үшін «Жас қанат» аллеясына жеке-жеке көшет отырғызды. Бұл дәстүрді ұстанудағы басты мақсат – кейін Астанада қонақта болғанда немесе гастрольдік сапарлармен келгенде, олар осы аллеядағы өз көшетінің қалай өскенін көреді. Сөйтіп, болашақ өнер жолдарының қалай басталғанын естеріне түсіруі тиіс…
Жыл өткен сайын «Жас қанатқа» қатысуға ниет білдірушілердің қатары кәсіби дайындықтан өткен әншілермен толыға түскенін ерекше атап өткен жөн. Бұл – келешекте байқауға қатысуға тілек білдірушілерге қойылатын талап та күрделене береді деген сөз. Сондай-ақ, іріктеу деңгейі де бірте-бірте жоғарылай түспек. Ереже бойынша қатысушылардың ішінен әр кезең сайын ұпайы төмен 5 әнші шығып қалып отырады. Бұл тұрғыда, «біздің заманымызда орындау техникасын жақсы меңгеру және керемет дауысқа ие болу, әрине, жеткіліксіз. Көрерменді өзіне тартып, назарын аудару үшін сахнада сапалы әрі тартымды өнер көрсету керек. Қазылар алқасы да жас орындаушылардың өз талантын толығырақ танытуға септігін тигізер. Бірақ, алдын-ала еске саламын, көрермендерден жасақталған қазылардың шешімі кәсіби қазылар қойған бағаларға еш әсер етпейді. Олардың көзқарастары бір жерден шыға ма, жоқ па, бұл жағы да белгісіз» деді Мұрат Ерғалиев.
P.S. «Жас қанат» байқауы жас әншілердің тұтас бір толқынын тәрбиелеп, қазіргі қазақ эстрадасының танымал өкілдерінің өнердегі жолын ашты десек, қателеспейміз. Оған ұлтына, білімі мен тұрған жеріне қарамастан, 30 жасқа дейінгі кез келген тілек білдіруші қатыса алады. Енді міне, кешегі күннен бастап 22-ші мәрте жастардың бақ сынауына мүмкіндік берген шара бүгін Астана тұрғындары мен қонақтарын тағы да қуантпақшы. Ал, ертең өтетін соңғы сында оларды көптеген сыйлықтар күтіп тұр.
Еркеғали БЕЙСЕНОВ
Уыз лебіз
Назымгүл БОЛАТХАН, Талдықорған қаласы:
– Жалпы, мен Астанаға үшінші рет келіп отырмын. Келген сайын таңқаларлық сезімге бөленемін. Ал, «Жас қанат» байқауына алғаш қатысып жатқандықтан, республикалық жас әншілер сайысына баратынымды кенеттен білдім. Сол қуанышты сәтте Петербургте өткен сайыста жүрген едім. Әріптестерім маған сәттілік тіледі. Сол жалынды лебіздері байқау барысында күш беріп, маған жеңіс әкеледі деген ойдамын.
Алдияр ЕРҒАЛИ, Көкшетау қаласы:
– Мұрат Ерғалиев айтып кеткендей, нағыз әртіс тек әнді орындап қана қоймай, сонымен қатар, белгілі бір образ қалыптастыра білуі қажет. Әуенді жан-дүниеңді сала отырып орындаған дұрыс. Мен көпшілік алдында ән айтқанды жақсы көремін. Әр әншіге көрермен – ең басты фактор болып саналады. Сондықтан, сахнаға шыққанда мен бар өнерімді көрсетуге тырысамын.
Руслан ИСМАЙЫЛОВ, Жезқазған қаласы:
– Бұл – менің өмірімдегі алғашқы күрделі сынақ. Қатты қобалжудамын. Осы байқауға жол сілтеп, қолдау көрсеткен досыма әрі продюсеріме шексіз алғыс білдіремін. Ол – 2009 жылғы «Жас қанат» қатысушысы Махамбет Қаратай деген азамат. Байқауға бір-екі айдай қызу дайындалдық. «Тек қана алға!» деген өмірдегі ұраныма жүгіне отырып, Астанаға алғаш рет келіп отырғаныма қуаныштымын. Мен ойлағандай ғажайып қала екен.