Жасөспірімдеріміз ‒ жарыс жеңімпазы!
Елордада футболдан жасөспірімдер арасындағы халықаралық дәрежедегі Қазақстан Республикасы Президентінің кубогын қазақ елінің өрендері жеңіп алды.
Жарысқа Қазақстан, Әзірбайжан, Грузия, Иран, Қырғызстан, Қытай, Литва және Бразилияның «Ботафого» командалары қатысты.
Екі топқа бөлініп сынға түскен турнирде Қазақстан мен Иран елінің жас футболшылары жеңіске жетіп, ақтық сында бақ сынасты. Алма-кезек шабуылмен өткен ойынның жетпіс бесінші минутында жалғыз голды Максим Котов салды.
Осылайша, Қазақстан жасөспірімдер құрамасы кубок жеңімпазы атанды. Екінші орынды ‒ Иран жеңіп алса, үшінші орын Литва елінің бозбалаларына бұйырды.
Турнирдің үздік қақпашысы ‒ Олег Грубов (Қазақстан), үздік қорғаушы ‒ Ричардас Швейкаускас (Литва), үздік жартылай қорғаушы ‒ Роман Гусейнов (Әзірбайжан), үздік шабуылшы ‒ Иран құрамасының капитаны Вахид Афтари деп танылса, ең үздік ойыншы сыйлығын Қазақстан құрамасының футболшысы Владислав Васильев иеленді.
Олжас СҮЛЕЙМЕНОВ