Жасотандықтар белсенділігі жоғары
Жастар – жасампаз күш. Олар жалынды, жігерлі болса, алынбайтын асу жоқ. Бүгінгі ұрпақ – алдыңғы ағаларға сенімді қолқанат, ертеңге құлшынысы мықты, жалындап тұрған толқын. «Нұр Отан» ХДП Астана қалалық филиалы «Жас Отан» жастар қанатының кезекті Х конференциясы өтті. Оған Астана қаласы әкімінің орынбасары Аида Балаева, «Нұр Отан» ХДП Астана қалалық филиалы Төрағасының бірінші орынбасары Қайрат Жаңабергенов, Қазақстан Республикасы Парламентінің депутаттары, «Жас Отан» жастар қанаты Астана қалалық филиалының белсенді мүшелері қатысты. Басқосу барысында Астана қалалық филиалының атқарушы хатшысы, «Жас Отан» жастар қанатының ІІ съезіне баратын делегаттар сайланды. Сондай-ақ, «Жастар – Отанға» атты 2020 жылға дейінгі стратегиялық жоба талқыланды. Аталмыш жоба жастардың жағдайы мен тұрмысын барынша жақсартуға мүмкіндік береді.
Алқалы жиында сөз алған Астана қаласы әкімінің орынбасары Аида Балаева: «Бүгінде елімізде 1043 жастар ұйымы болса, оның ішіндегі ең ауқымдысы әрі белсендісі «Жас Отан» жастар қанаты болып табылады. «Жас Отан» жастар қанаты – «Нұр Отан» Халықтық демократиялық партиясының берік тұғыры ғана емес, мемлекеттік жастар саясатын қалыптастыру мен дамытудың үлкен орталығы» дей келе, партияның Астана қалалық филиалының төрағасы Иманғали Тасмағамбетовтың сәлемін жеткізді. Ел дамуы үшін жастардың жаңа идеялары керектігін атап өткен ол, залдан қойылған сұрақтарға да тұшымды жауап қайтарды. Сондай-ақ, болашақтың іргетасы мықты болып қалануы үшін, жастардың мәселесін шешіп, олардың мәдениеті мен тәрбиесіне жіті көңіл бөлу керектігін айтты.
Бүгінде жасотандықтардың қоғамдық белсенділігі жоғары. Олардың бастамасымен «Ауылдың гүлденуі – Қазақстанның гүлденуі» бағдарламасы аясында елді мекендерді көркейтуге үлес қосушылар қатары артты. «Дипломмен – ауылға» бағдарламасы бойынша көптеген жас маман жұмысқа орналасты. Сондай-ақ, «Қазақша сөйлесейік», «Еркін пікір» сынды жобаларды жүзеге асырып келеді. Жасотандықтар ел жастарының базалық әлеуметтік проблемаларын жоспарлы түрде шешуге көңіл қойды. Олар жас та болса бас болып, өз замандастарының қазіргі қордаланған мәселелерін талқыға салып, шешу жолдарын қарастыруда.
Шара соңында «Жас Отан» жастар қанатына шоғырланған белсенді өрендер білім мен еңбекті ұштастырып, ел игілігіне қызмет етуге әзір екендерін білдірді. Конференция жасотандықтардың белсенді мүшелерін марапаттаумен аяқталды.
Еркежан СӘТІМБЕК