Кеше Тәуелсіздік сарайында Мемлекет басшысы, «Нұр Отан» партиясының төрағасы Нұрсұлтан Назарбаевтың қатысуымен «Елбасымен бірге – жаңа жеңістерге!» атты жастар форумы өтті.
Еліміздің болашағы – бүгінгі жастар. Олар білімді, парасатты, отансүйгіш сезімін жүрегіне ұялатқан азаматтар болса, Қазақстанның келешегі де сенімді қолда. Елбасы өскелең ұрпақ алдында тәуелсіздіктің қадіріне жету, туған елі мен жерін сүю, тарихтан тағылым алу мәселелері төңірегінде келелі әңгіме өрбітті.
Бұл форумның мақсаты – жаңа жаһандық жағдайда еліміздің дамуындағы жастардың рөлін айқындау екендігін атап өткен Мемлекет басшысы Қазақ елінде жасалып отырған жақсылықтар мен жетістіктердің бәрі жастардың игілігіне арналғанын еске салды. «Біз ата-бабамыздан мирас болып қалған атамекенімізді тәуелсіз ел еттік. Тұрмысы шалқып, түтіні түзу шыққан бақуатты мемлекетке айналдырдық. Күллі дүние жүзі қазақ деген елдің бар екенін білді. Мұндай тәуелсіз елде өмір сүру – үлкен бақыт. Оның қадіріне жету – өз қолдарыңызда. Ендігі сендердің алдарыңда тұрған негізгі міндет – тұрақтылықтың тұғыры – татулық пен бірлікті тұмардай сақтау. Ол үшін әрқайсымыз, әсіресе, сіздер, жастар, өздеріңізге жүктелген тарихи жауапкершілікті сезіне білулеріңіз керек. Жастар тәуелсіздікті көздің қарашығындай қорғап, елдігіміздің тұғырын биіктете түсуі қажет» деді Президент.
Жиынға қатысушылар Елбасының аузынан ұлттық тарих құндылықтары жөнінде де тағылымды әңгіме тыңдады. Ол қазақтың тамыры терең тарихы азат ел болуымыздың іргетасы болғанын атап өтті. Ұлы құндылықтарды ұлықтай білу – әрбір жастың, әрбір Президенттің, баршаның жауапкершілігі. Биыл қазақ хандығының 550 жылдығы аталып өтуінің өзі үлкен мәнге ие. Сондықтан жас ұрпақ тарихтан тағылым ала отырып, өз мемлекетін жақсартуды ойлап, оның өркендеуіне үлес қосуы тиіс. Жастардың әрқайсысы Қазақстанның ұлттық идеясы – Мәңгілік елді іске асыруға белсене атсалысуы керек. Ол үшін жастар жан-жақты білім алуға ұмтылғаны абзал. «Жастардың күш-жігері – білімі мен білігінде, бірлігі мен отансүйгіштігінде. Осы қасиеттерді бойына жинаған жастары бар елдің болашағы да жарқын» деді Нұрсұлтан Назарбаев.
Бүгінде еліміз әлемнің озық отыз елінің қатарына қосылуға талпынып отырғаны белгілі. Бұл мұратқа жету үшін экономиканы, инновациялық технологияны дамытудың маңызы зор. Елбасының айтуынша, экономика дамуы тоқтаған кезде, мемлекеттiң алға жылжуы да тоқтайды. Бәсекеге қабілетсіз экономика көп ұзамай құлдырайды. Тарих екi бағаны ғана бiледi: не жеңесiң, не жеңiлесiң. Сондықтан дамыған елдер көшінен қалмай, мемлекетіміз алға дамуы үшін жастар ерінбей оқып, қажырлы әрі тиімді еңбектенуі керек. Ол үшін елімізде барлық мүмкіндік қарастырылған. Елдің алдына қойып отырған басты мәселе де – азаматтарды жұмыспен қамту. Қалғанын саналы адам өзі-ақ жасап алады.
Жастар форумына еліміздің түкпір-түкпірінен келген 2 мыңдай делегат қатысты. Олардың қатарында «Жас Отан» жастар қанаты өңірлік филиалдарының өкілдері, жастар ұйымдарының көшбасшылары, шығармашыл, ғылыми, жұмысшы, ауыл өрендерінің өкілдері және белгілі қазақстандық спортшылар бар.
Форум қорытындысы бойынша қатысушылар Қазақстан жастарына арнап «Елбасымен бірге – жаңа жетістіктерге!» үндеуін қабылдады.
Қымбат ТОҚТАМҰРАТ
