Елбасының Жарлығына сәйкес қыркүйек айының үшінші жексенбісі Қазақстан халқының тілдері күні болып белгіленді. Астана қаласында биыл Тілдер фестивалі XV рет өткізіліп отыр. Осы негіздегі іс-шаралар туралы Астана қаласы Тілдерді дамыту басқармасының тілдерді дамыту және үйлестіру бөлімінің басшысы Құралай Ақсейіт әңгімелейді.
– Тіл фестивалі аясында қандай іс-шаралар ұйымдастырылады?
– Мемлекеттік тілге құрметті қалыптастыру, тіл мәдениетінің деңгейін көтеріп, мемлекеттік тілдің қолданылу аясын кеңейту мақсатында орыс сыныптарындағы қазақ балалары арасында арнаулы олимпиада және орыс жастары арасында «Тіл – халық жанын танудың кілті», жергілікті мемлекеттік органдарда, мемлекеттік ұйымдар мен кәсіпорындарда, аумақтық мекемелерде қызмет істейтін мамандар арасында «Мемлекеттік тіл – мемлекеттік қызметте» атты қалалық байқаулар ұйымдастырылады.
Сондай-ақ, қаладағы барлық сала мекемелері Қазақстан халқы тілдері күніне арналған іс-шаралар өткізеді.
– Биылғы фестивальдің өзгешелігі бар ма?
– Атап айтатыны, орыс сыныптарындағы қазақ балалары арасында да қалалық тіл олимпиадасының өтуі. Бұған дейін Абайдың рухани құндылықтарын көрсете отырып, әдеби мектебін, тіл мектебін, ұлт пен рух мектебін ашу, ұлы ақынның мұрасын жастардың санасына сіңіру мақсатында үлкен жұмыстар атқарылды.Тағы бір мәселе – қазақ тілінде сауатты, жаңашыл, көркем безендірілген жарнамаларға қолдау көрсету. Осы тұрғыда «үздік жарнама» байқауында тақырыптың өзектілігі, жарнама мәтінінің мағыналығы мен тартымдылығына, безендірілуі мен дизайнерлік шеберлікке баса маңыз берілейін деп отыр.
– Өзге ұлт өкілдерінің мемлекеттік тілге ықыласы қалай?
– Қазақстанда 130-дан астам ұлт пен ұлыс өкілі тұрады. Бүгінгі таңда қалада татар-башқұрт, армян, еврей, украин, тағы да басқа ұлттық мектептер жұмыс істейді. Республикамыздың білім ордаларында 11 ұлт тілі оқытылады. Ал мемлекеттік тілді меңгерген өзге ұлт өкілдерінің деңгейі жылдан жылға артып келеді. ҚР Президенті Жарлығымен бекітілген «Тілдерді қолдану мен дамытудың 2011-2020 жылдарға арналған мемлекеттік бағдарламасы» толық күшіне енді. 2017 жылға қарай мемлекеттік тілді меңгергендердің үлесі 95 пайызға жетуі қажет. Бұл – жауапкершілігі зор міндет.
Таңатар ТӨЛЕУҒАЛИЕВ
