Алдағы жылдың 1 қаңтарынан бастап тегін дәрі-дәрмек бойынша электронды анықтамалық іске қосылады. Осыған байланысты, халықты тегін дәрілермен қамтамасыз ету мәселелерін 1439 бірыңғай жедел желі нөміріне хабарласып білуге болады.
Байланыс орталығының операторлары амбулаторлық емді алатын емделушілерге тегін босатылатын қажетті дәрі-дәрмектерді жеткізу мерзімдері, көлемдері мен жоспарланған күні туралы ақпаратты береді.
Бірыңғай дистрибьютор «СҚ-Фармация» ЖШС басқарма төрағасының міндетін атқарушы Берік Шәріптің айтуынша, байланыс орталығының қысқа нөмірін іске қосу – бұл денсаулық сақтауды цифрландыру шеңберінде компания жүзеге асырып отырған бірнеше жобалардың бірі. Тағы бір жоба, дәрілерді жеткізу туралы емделушілерді хабардар ету үшін жоспарланған. Бұл – емханаларда тегін дәрілердің болуы бойынша бірыңғай электронды анықтама.
