Жемқорлық – қоғамның жарасы
Қоғам. Адам. Сана. Олар жұмыла, дами келе өркениетті, дамыған ортаның қалыптасуына себепші болады. Саналы адам қоғамға өз үлесін қоса келе, сол қоғамды ілгері жылжытатыны анық. Ал дәл осылай қалыптасып келе жатқан ортаға іріткі қосатын басқа факторлар да жоқ емес. Олардың бірі әрі бірегейі – жемқорлық. Заманымыздың тағы бір дерті де – осы.
Қанша күрескенмен, оның «жылы қанатының» астынан пана іздейтін адамдардың қатары да сиремей жатыр. Бұл істің арқасында кәсібін дөңгелетіп, біраз «жағдайын» жасап алғандар да жоқ емес. Тіпті, құрықталып, сотталған «әріптестерінің» мысалы да бұл азаматтарды қорқытпайтын сыңайлы. Бұл дерт өршіп бара жатқан тұста еліміз сан алуан шараларды қолданды. Алдымен бұндай істермен айналысып, алдын алатын арнайы департамент те құрды, заң да қабылдады. Жылдар өтті. Ал «жемқорлық» деген індет тамырымен жоғалғанын байқап жатқанымыз жоқ. Өкінішті. Жақында аталмыш «Сыбайлас жемқорлыққа қарсы күрес туралы» Заңға толықтырулар енгізіледі деген сыбысты құлақ шалған еді. Ендігі үміт – осы заңның қаталдығы жемқорларға қолбайлау болса.
Осы ретте, мемлекеттік органдар көптеген жұмыстарды қолға алуда. Мемлекеттік қызметке тұрмас бұрын, үміткерлер басқа заңдармен қоса, «Сыбайлас жемқорлыққа қарсы күрес туралы» заңы бойынша да тестілеуден бағын сынайды. Яғни, мемлекеттік қызметке тұратын әр азамат бұл Заңның мазмұны мен оның жазаларымен жақсы таныс болады деген сөз.
Бүгінгі күні жемқорлық пен сыбайлас жемқорлықтың кез келген жағдайына тап болған адам бұл факті жайында құзырлы органдардың сенім телефондарына хабарлай алады.
Астана қаласы Төтенше жағдайлар департаментінің қызметкерлері арасында түсіндіру жұмыстары, сыбайлас жемқорлықтың алдын алуға бағытталған іс-шаралар жиі ұйымдастырылады. ТЖД мамандары жергілікті атқару органдарымен, қалалық шұғыл қызметтермен тығыз қарым-қатынаста жұмыс жасайды. Сондай-ақ, меншік нысанына қарамастан қаладағы объектілерде төтенше жағдайдың алдын алуға бағытталған тексеру жұмыстарын жүргізеді.
Тексеру барысында нормативтік-құқықтық актілер талаптарының бұзылғаны анықталуы мүмкін. Ондай жағдайда Әкімшілік құқық бұзушылық туралы кодексті негізге ала отырып, белгілі талаптарды бұзған тұлғаға қатысты әкімшілік жауапкершілікке тарту туралы хаттама толтырылады. Оған қатысты әкімшілік жауапкершілікке тарту туралы қаулы шығарылып, жіберілген кемшіліктерді жоюға ұсыным беріледі.
Астана қаласы ТЖД-нің мұрындық болуымен, аталмыш індеттің алдын алуға бағытталған іс-шаралар биылғы жылы көптеп ұйымдастырылды. 30 мамыр күні Астана қаласы ТЖД бастығының орынбасары В.Овчинниковтың төрағалығымен «Департаменттің инженерлі-инспекторлық құрамының қызметінде сыбайлас жемқорлық заңын бұзуды болдыртпау және әкімшілік тосқауылды төмендету» тақырыбында дөңгелек үстел өтті. Оның барысында Астана қаласы Прокуратурасының, Әділет департаментінің өкілдері және «Нұр Отан» халықтық-демократиялық партиясының астаналық филиалының өкілдері мен департамент бөлімшелері қатысты. Отырыс барысында қозғалған тақырыптардың бірі – «Нұр Отан» халықтық-демократиялық партиясының сыбайлас жемқорлықпен күрес бағдарламасы туралы болды. Бұдан бөлек, заңды тұлғаларды тіркеу саласында қызықтырған сұрақтар қойылып, «Сыбайлас жемқорлықпен күрес туралы» заңға толықтырулар енгізілуі мүмкін туралы мәселелер қозғалды.
Ағымдағы жылы бұл тақырып төңірегінде атқарылған жұмыстардың қатарында Қаржы полиция академиясының полиция аға лейтенанты Р.Аймұқановпен кездесуді де атап өтуге болады. Іс-шараға Астана қаласы ТЖД басқарма, бөлім бастықтары, «ӨС және АҚЖҚ» ММ, ӨСБ, МӨСБ бастықтары қатысты. Негізге алынған тақырып – «Қазақстан Республикасы Президентінің Жолдауында айтылған сыбайлас жемқорлыққа қарсы заңды жетілдіру» болды.
Аға лейтенант Р.Аймұқанов Қазақстан Республикасының Қылмыстық кодексіндегі сыбайлас жемқорлық және қылмыстық құқығын бұзу саласына өзгерістер енгізу жоспарланып жатқандығын баяндады. Кеңес диалог түрінде өтті. Көкейкесті мәселелер талқылауға шығарылып, оларға өкілетті маман толық жауап қайтарды.
Қазақстан Республикасының Президенті Нұрсұлтан Назарбаев мемлекеттік құрылымдардың назарын сыбайлас жемқорлықтың қауіптілігіне бірнеше рет аударған болатын. Оның әлемдік деңгейдегі мәселеге айналғанын, бұл дерттің саяси тұрақтылығы мен экономикалық даму деңгейі жоғары мемлекеттерде де орын алғандығын тілге тиек еткен. Осы әлеуметтік зұлымдықтың алдын алу үшін сыбайлас жемқорлыққа жол ашатын жағдайларды үнемі жойып, сақтандыру жұмыстарын жүргізіп отыру қажет.
Мемлекеттік қызметте жүрген әр азамат өз қызметіне адал, ар-ұят пен басқа да құндылықтарды жоғары қоятын болса, қоғамда жемқорлыққа жол берілмейтіні анық.
Құрметті қала тұрғындары! Астана қаласы Төтенше жағдайлар департаменті қызметкерлерінің тарапынан жүргізілген тексерулердің нәтижесінде, сыбайлас жемқорлыққа жол берген жағдайды байқаған болсаңыздар, 70-17-22 сенім телефондарыны қоңырау шалыңыздар.
Астана қаласы Төтенше жағдайлар департаментінің баспасөз қызметі