ЖЕҢІСТІ СЕРИЯ ЖАЛҒАСУДА
Қазір нағыз бабында тұрған «Барыс» хоккей клубы бесінші рет қатарынан жеңіске жетті. Бұрнағы күні «Барыс» өз айдынында екатеринбургтік «Автомобилист» командасын қабылдап, жауапсыз төрт гол соғып, басым түсті.
Елордалықтар матч басталысымен ентелей алға ұмтылды. Үсті-үстіне соққылаған шабуыл көп ұзамай нәтижесін берді. Кирилл Панюковтың лақтырған шайбасын қақпашы қағып түсіргенімен, Александр Липиннің соққысына тойтарыс бере алмады.
Келесі жиырма минутта Екатеринбургтен келген қонақтардың сәл еті тіріле бастағандай көрінген. Бірақ Брэндон Боченски ұрымтал сәтті пайдаланып, бос жатқан бұрышқа шайбаны тоғыта салды. Артынан Найджел Доус есепті еселеп кете жаздады. Көп ұзамай ол ақыры дегеніне жетіп, Сен-Пьер мен Даллмэн бастаған шабуылдың тамаша нүктесін қойды.
Үшінші айналымда да астаналықтардың асығы алшысынан түсті. Тағы екі гол салды. Кеудесін «оққа» тосқан, сол өткендегі «Мервешнак» клубының 29 соққысына төтеп берген «Барыс» қақпасын күзеткен Хенрик Карлссон бұл жолы табандылығынан таймады. Иә, сол кездегідей қақпасын құрғақ сақтап қала алды.
Есеп – 4:0. Бұл нәтиже «Барысты» плей-офф аймағынан бір-ақ шығарды.
Александр Липин,
«Барыс» командасының ойыншысы:
– Біз бұл ойынға тыңғылықты дайындалдық. Қарсыласымыз – плей-офф жолындағы көлденең кедергіміз. Алты ұпай үшін болған айқаста мұрнымыздан қан кеткенше қарсы тұру керек болды. Осыған дейін бұларға екі рет есе жібердік. Жігіттер өздерін жақсы ұстады. Бәрі жарады. Карли тектен-тек ең үздік ойыншы атанған жоқ. Ол – қазір, сөзсіз, команданың бірінші қақпашысы. Біздің алаңда жасаған қателіктеріміздің барлығын сол тазалап отырады. Сондықтан осы жеңістің үштен екі бөлігі – соның еңбегі.