ЖЕРТӨЛЕ МАСАЛАРЫ МАЗАНЫ АЛСА…
Бүгінде Астанада күн жылына су басып кететін 100-ден астам жертөле бар. Қар ери бастаса, осы жертөлелерге лай сумен бірге шыбын-шіркей де үймелегіш. Мұнда алдымен жететін – масалар.
Тұрғындардың берекесін алатын жертөле масаларымен жыл бойы күрес жүргізіледі. Бірақ көктем келе, бұл жәндіктерден мезі болған жұршылықтың шағымы да көбейе түседі. Алматы мен Сарыарқа аудандары бойынша 70 үйдің жертөлесі суға толып кетеді. Оған жауапты ПИК-тер дер кезінде шара қолдануға асықпайды. Тіпті, тұрғындардың шағымын құлағына ілмейтіндер де бар. Айталық, «Нұргүл», «Уют-2008», «Шолпан», «Уют-3», «Нұр-Жеңіс», «Сұлтан», «Ақбұлақ А», «Арай-2», «Кожабекова» ЖК, «Кизатов», «Батыр-КСВ» ЖШС сынды пәтер иелерінің кооперативтері елдің арызын елемей отыр.
Жалпы қала аумағында жертөле масаларына қарсы өңдеу жұмыстарын уақытында өткізбеу ашық аумақтарда масалардың санының көбеюіне әкеліп соғады. Бұл жәндікке көпшілік аса мән бермегенімен, ол түрлі вирустарды тасымалдаушы болып табылады.
Маса ағзасында түрлі вирустар бірнеше күннен бірнеше айларға дейін өмір сүреді. Көп вирустар маса ағзасында «қыстап», көктемде жәндік қауіпті тасымалдаушыға айналады. Ал кейбір вирустар масалардың бір ұрпағынан екінші ұрпағына жұмыртқалары арқылы беріліп отырады. Сондықтан масалар тұрғындардың мазасын қашырмау үшін ПИК-тер өз қаржысы есебінен алдын-алу шараларын ұйымдастыруға келісім-шарт жасауға тиіс. Жертөле масаларын жою және сол төңіректі өңдеу жұмыстарын арнайы рұқсат қағазы бар ұйымдар ғана жүргізе алады.
Масаларды жою жұмыстары биыл сәуір мен қыркүйек айлары аралығында жүргізілетінін естеріңізге саламыз. Осы шараларды өткізуге ПИК басшыларынан талап еткендеріңіз жөн. Өйткені бұл ең алдымен сіздердің денсаулықтарыңыз бен жайлы өміріңіз үшін жасалады. Егер тұрғын үйлер мен өндіріс ошақтарында қажетті санитарлық –гигиеналық жағдайлар сақталмаса, масалардан жыл бойы арыла алмауыңыз мүмкін. Осыған байланысты қандай да бір сауалдарыңыз болса, мына телефонға хабарласуыңызға болады: 316 – 017
Нағима ШАТАЕВА,
Астана қаласы бойынша Тұтынушылардың құқықтарын қорғау департаментінің
бөлімі бастығы