«Жезкиікпен» жүздесті
Л.Гумилев атындағы Еуразия ұлттық университеті «Кәусар» мәдени-танымдық бірлестігінің ұйымдастыруымен мемлекет және қоғам қайраткері, ақын Кәкімбек Салықовпен кездесу өтті.
Тағылымды шараны Қазақстанның еңбек сіңірген әртісі, бірлестік жетекшісі Кенжеғали Мыржықбай жүргізіп отырды.
Кеште ақынның өмірбаяны таныстырылып, филология факуль-
тетінің студенттері оның өлеңдерін оқыды. Поэзияның ақсақалына жас шайыр Кәмшат Жұбатқан жүрек жарды жыр шумақтарын арнады. Сондай-ақ, Фариза
Жылқайдарова, Адам Кәкім,
Біржан Есжанов, Қапаш Құлышева және Серік Оспановтар ақын сөзіне жазылған «Жезкиік», «Үш арыс», «Ақан сері», «Оқжетпес», «Көкшетау», «Бір ауыз сөз» сынды әндерді нақышына келтіре орындады.
Басқосу кеш қонағына студенттер тарапынан қойылған сауалдармен жалғасты. Кәкімбек Салықов жан-жақты жауап қайтарып, әдемі
әзілдерімен кездесудің ажарын аша түсті. Шара соңында ақынға және өнерлі студенттерге естелік сыйлықтар тапсырылды. Қазақ поэзиясының қариясы оқу орны ұжымына алғыс білдіріп, қолтаңбасымен жаңа шыққан кітабын тарту етті.
Данияр ҚАЙЫРТАЕВ,
Л.Гумилев атындағы Еуразия ұлттық университетінің студенті