Астанада жүзеге асырылып жатқан Joltap жобасы қала тұрғындарына жұмыс тауып беріп қана қоймай, білігін және кәсіби мүмкіндігін арттыруға көмектесіп жатыр. Жоба түлегі Айсұлу Саметова оқу барысы туралы ой бөлісті.
Айсұлу Саметова жиһаз дизайны саласында жұмыс істейді. Декреттік демалыста бос уақыты болғандықтан, өзіне таңсық мамандықты меңгермек болады. Осылайша ол Joltap жобасы туралы әлеуметтік желіден білген.
«Instagram желісіндегі хабарламаға көзім түсіп кетті. Мұны өзімді дамытуға, көзқарасымды кеңейтуге және жаңа мамандықты игеруге қажет мүмкіндік деп көрдім. Жоба маған қажет нәрсенің бәрін береді деген үміт болды. Осыған дейін жиһаз жасау саласында жұмыс істегенмін, бірақ жүйелі білім жетіспейтін. Joltap курсы маған барлық білгенімді жүйелеуге және жаңа дағдыларды меңгеруге көмектесті» дейді Астана қаласының тұрғыны.
Алдымен ол жиһаз құрастырушы мамандығы бойынша оқуды таңдаған. Курс тәжірибелі мұғалімнің жетекшілігімен өтті. Айсұлудың айтуынша, тәжірибеге ерекше көңіл бөлді.
«Біз өлшемдерді есептеуді, материалдарды таңдауды және жиһаз құрастыруды үйрендік. Курстың соңында жиһазды өз бетімше құрастыра алатын болдым. Бұл білім мамандығыма деген сенімді арттыруға және білігімді кеңейтуге мүмкіндік берді» деп атап өтті дизайнер.
Курс барысында Айсұлу Саметова жиһаз дизайнері ретінде өзіне қажет білімді толықтай меңгергенімен де бөлісті. Алайда ол мұнымен ғана шектелмеді. Курсты оқи жүріп, мобилографияға да қызығушылық танытты. Сол себепті осы мамандықты қосымша меңгеріп алмақ болды.
«Қысқа мерзімде қарқынды оқыту курсынан өттік. Негізгі назар тәжірибеге берілді. Көп ұзамай кәсіби мобилографияны үйрендім. Бұл білім маған мансаптық мүмкіндігімді кеңейтуге көмектесті, енді оны жұмысыма да қолдана аламын. Тиісінше, жалақым да артты» деп атап өтті жоба түлегі.
Айсұлудың пікірінше, бұл жоба өзін жаңа салада байқап көруге немесе мамандығы бойынша дағдысын дамытуға ерекше мүмкіндік береді.
«Мен Joltap жобасына білігімді арттыруға көмектескені және жаңа мақсаттарға шабыт бергені үшін өте ризамын. Соның арқасында кәсіби құзыретімді арттырып қана қоймай, жаңа адамдармен таныстым» деп ол сөзін түйіндеді.
