Қалалық мәслихаттың мәжіліс залында өткен дөңгелек үстел барысында елордадағы көше-жол желісін дамыту және қоғамдық көлік қызметін жақсарту туралы мәселе талқыланды.
Мәслихат хатшысы С.Есілов бүгінгі басқосудың алдында бір топ депутаттар елордадағы көлік кәсіпорындарында болып, автобус бағыттарының жұмысымен жақынырақ танысып-зерттеп, өздерінің ұсыныстарын Жолаушылар көлігі және автомобиль жолдары басқармасына жолдағанын жеткізді.
Бүгінде қала тұрғындарының жылдам әрі ыңғайлы жүріп-тұруын қамтамасыз ету басты проблемалардың біріне айналып отыр. Бұл ретте қалалық Жолаушылар көлігі және автомобиль жолдары басқармасының бастығы Рашид Аманжолов депутаттарды осы салада атқарылып жатқан жұмыстармен таныстырды.
«Елорда жолдарындағы жүктеменің жоғарылығы өздеріңізге мәлім» деп бастаған басқарма бастығы одан әрі Астанада жалпы ұзындығы 946 шақырымды құрайтын 952 көше барын, солардың жетпіс пайызға жуығы асфальтталғанымен, қалған 287 шақырым жолға тас төселмегенін айтты.
СҮБЕЛІ СӨЗ
Қоғамдық көліктер туралы айтар болсақ, Астанада тәулік бойы 669 мың жолаушыны тасымалдайтын 8 автопарк, 941 автобус жұмыс істейді екен. Дегенмен, қоғамдық көлік қызметіне көңілі толмайтындар қатары азаймай отыр. Мәселен, 2012 жылы тұрғындардан 1914, ал өткен жылы 2524 өтініш-шағым түссе, былтыр Астанада 254 жол-көлік оқиғасы тіркелген.
Соңғы алты жылда бас қалада 406 автобус сатып алыныпты. Соған қарамастан, қолданыстағы көліктердің 17 пайызы тозған, 14 жылдан бері пайдаланылып жүрген ескі көліктер көрінеді.
– Жүргізушілердің тұрақтамауы да бұл саладағы басты проблемалардың бірінен саналады. Қазіргі таңда қаладағы көлік кәсіпорындарына әлі де 700 адам жетіспейді. Осыған орай, біз халықаралық тәжірибені зерттедік. Соның нәтижесінде, алдағы уақытта көлік жүргізушілерін оқыту және біліктіліктерін арттыру жөніндегі жаңа орталық құрылады, – деді Рашид Аманжолов. – Ол негізінен психологиялық тренингтерден тұрады. Яғни, жүргізуші симуляторға жіберілмес бұрын тестілеуден өтеді. Симуляторлар сатып алынады. Оқыту бағдарламасы 80 сағатты құрайды. Оның басым бөлігі нақ осы психологиялық ахуалға арналады. Адам өзін қалай ұстайды? Оған автобусқа отыруға бола ма, әлде, ол механик болуға ғана жарай ма? Осының бәрі тексеріледі. Аталған орталық сәуір айында өз жұмысын бастайды.
Үстіміздегі жылы ай сайын 80 адамды оқыту көзделіп отыр.
Сонымен бірге қалалық Жолаушылар көлігі және автомобиль жолдары басқармасы басшысы сол жағалаудағы Есіл өзені бойында орналасқан әкімшілік орталық пен Қосшы тұрғын алабына жылдам жету туралы елордалықтардың өтінішінен кейін үстіміздегі жылдың 5 наурызынан бастап №52 жүрдек маршруты ұйымдастырылғанын, оның «Аймақаралық аурухана» – «Лесная поляна» тұрғын алабы арасында қатынайтынын, дей тұрғанмен алдағы уақытта автобус бағыттары қала тұрғындарына қолайлы болуы үшін қозғалыс кестесі жүйеленіп, тәуліктің әртүрлі уақытындағы көліктік жүктеме көрсеткіштерін және тағы басқаларды ескере отырып, заманауи көлік моделін енгізу қолға алынатынын айтты. Демек, бұған дейін отыз шақырымға дейінгі аралыққа қатынайтын автобустардың бағыты енді екіге бөлініп, әр автобустың 15 шақырымға қатынауы көзделуде. Осының нәтижесінде енді бір ғана қоғамдық көлікке мініп алып, қаланы түгел аралап шығу мүмкін болмайтын сияқты.
Биыл 350 жаңа автобус сатып алынады. Сондай-ақ, «IVECO» компаниясымен жасалынған келісімшарт негізінде үстіміздегі жылдың мамыр айынан бастап біртіндеп су жаңа автобустар келе бастайды, ал 2017 жылға дейін жалпы саны 850 автобус сатып алынады.
Гүлбаршын ӨКЕШҚЫЗЫ
