Жомарт САБЫРЖАНОВ, асық ату федерациясының вице-президенті: АСЫҚ АТҚАН АЛҒЫРЛЫҚҚА ЖЕТЕЛЕЙДІ
– Жомарт Сабыржанұлы, алдымен бірнеше жылдан бері Астана қаласында ұйымдастырыла бастаған асық ату ойынының биылғы жайын әңгімелесеңіз...
– Ұлттық ойынымызды жандандыруға әу бастан күш салуымыз керек еді. Алайда, «ештен кеш жақсы» деген. Жыл санап, ахуал жақсарып келеді. Әсіресе, Астана әкімдігі мен Ұлттық спорт түрлері қауымдастығы қамқорлығының арқасында ілгерілеу бар. Айталық, алғашқы жылдары бұл ойынға биылғыдай еліміздің барлық өңірі қатыса алған жоқ. Соңғы ойында он алты команда бақ сынап, отыз екі ойыншы өнер көрсетті. Сегіз төреші әділдігін бақылады. Он алты жасқа дейінгілер арасында да, одан жоғары жастағылар арасында да бірінші тұғырды маңғыстаулықтар иеленді.
Жарыс барысында Жұматай Әлиев, Ермахан Ыбрайымов, Қыдырәлі Болманов, Қайрат Нұртас, Мұхамеджан Тазабеков сынды елімізге танымал азаматтар өнер көрсетіп, өзара сайысқанын да айту керек.
– Өзіңіз айтқан Ұлттық спорт түрлері қауымдастығы ұйымдастырған Наурыз мейрамында асық атуға арналған төсенішпен танысқан едік. Бұл игі жаңалықты осы ойында пайдаландыңыздар. Тағы қандай жақсы хабарды сүйіншілейсіз?
– Берлинде Еуропа қазақтарының кіші құрылтайы өтеді жақында. Ұлттық бірегей ойынды сонда алып бара жатқан жайым бар. Өзге топырақтағы қандастарымыздың арасында асық атуды насихаттамақпын. Ойын түрін халықаралық деңгейге шығару басты армандарымның бірі екенін айтқым келеді.
Тынымсыз тірлігіміздің жемісі болар, бүгінге дейін еліміздің сегіз аймағында Асық ату федерациясының филиалдары ашылып үлгерді. Бұл іс әлі де қанат жаяды деген үміттемін. Еуразия ұлттық университетінде өткен додаға асық жинау рекордының иесі Болат Тағабай келген. Ол Ұлттық спорт түрлері қауымдастығына мың асық пен он сақа сыйлады. Болат Құдайбердіұлының қоржынындағы асықтың саны бүгінде 38 мыңға жетіпті. Спорт жанашыры келер жылы Шығыс Қазақстан облысында асық атудан жарыс өткізетінін айтты.
– «Асық атқан – азар…» деген сөз бар еді. Алайда, бүгінгі буынды осы ойын түріне үйірсектете алмай келеміз…
– Иә, оның рас. Біз ұлттық ойынымызды дамытып, теледидар мен телефонға, интернетке телмірген балаларымызды ашық аспан астында ойнауға алып шықсақ дейміз. Асық ойыны баланың жастайынан жүйке жүйесін шыңдап, оларды дәлдікке, алғырлыққа, байсалдылыққа тәрбиелейді. Мұндай қасиеті болмаса, адамда төзімділік те, шыдамдылық та болмайды. Сондай-ақ, асық ату көз көрімін арттырады екен.
Тағы айта кетерлігі, біз ұйымдастырған жарыстар 4-5 сағаттан аспайды, яғни, асығыс өтеді. Жастарды құмарлары қанғанша, екі-үш күн бойы ойнатып сайыстырсақ деймін. Құмардан шыға ойнамағаннан кейін, қадірін де жете білмейміз ғой асықтың.
Асхат РАЙҚҰЛ
