– Жуырда бiр ағамыз өзiнiң әке-шешесiн қалаға көшiрiп алып жатқанда қаршадай баласының: «сонда бiзде ендi ауыл болмай ма?» деп мұңайғанын айтқан едi. Бала болса да, кiшкентай бiр қазақтың жүрегi әлденеге сыздаған тәрiздi…
Статистикаға көз жүгiртсек, бүгiнде қазақтың жартысынан көбi қалада тұрып жатыр екен. Бұл, расында да, қазақтың болашағына қалай әсер етуi мүмкiн?
– Бiзде қалаға келуден қорқу бар. Мәселен, мен бала күнiмде қалаға келуге қорқатынмын. Неге десеңiз, көшпендi тiршiлiктi өзiмiз көрмесек те, оның психологиясы жадымызға жазылған. Дала мiнезiмен рухтанып, көшпелi өмiр салтымен санамызды түзеген халықпыз. Сол себептi, қалаға келсек, тар жерде қамалып, еркiндiгiмiзден айырылып қалатындай үрейiмiз ұшады. Осындайда Әуезовтiң «Қараш-қараш оқиғасындағы» Бақтығұлдың бейнесi ойыма орала бередi. Еркiндiкке, кеңдiкке үйренген Бақтығұл түрмеден қатты қорқады емес пе? Қазақтың қалаға келуден сескенуi соған ұқсайды. Даладан, кеңдiктен келген қазақ үшiн тар үйге, қаланың қалыпты тiршiлiгiне сiңiп кету түрмеден кем болмаған тәрiздi.
Бiрақ, тiршiлiк болған соң, көндiгуге тура келедi.
«Соғыс және бейбiтшiлiктi» оқыған болсаңыз, француздар келген кезде армян ұлтының өкiлi суреттелетiн жерi бар. Қоныс аудару кезiнде қандай күй кешкенi бейнеленедi. Қазақ, әрине, ондай үлкен мегаполиске келе алмаған. Үлкен шығармаларға кейiпкер болып ене қоймағаны да сондықтан. Және оған бiздiң халқымыз бас қатырмаған да.
Ал қазақтың қалалануы ұзақ процеске созылған.
– Қазақ елiнiң қалалана бастауына жобамен қанша жыл болды?
– Менiң пайымым бойынша, кем дегенде 150 жыл болды.
– Сонда сiз де қазақта орысқа бодан болғанға дейiн қала болғанын жоққа шығарасыз ба? Шаһар мәдениетiн орыстар үйреттi дегенге мойынсұнасыз ба?
– Жоқ! Мен қазiргiдей еуропалық үлгiдегi қалалар жөнiнде айтып отырмын. Әйтпесе, қазақтың өзiндiк қала мәдениетi, тарихи қалалары аз болмаған.
Жалпы, мен былай ойлаймын. Отырықшылық пен көшпендi өмiр салтын қазақ бұрыннан табиғи үйлесiмдiлiкпен сақтаған. Тарихқа зер салсаңыз, көбiне малы көп, бай, дәулеттi адамдар тiршiлiкке қолайлы жерге маусым сайын көшiп-қонып, жатақ ұғымы әлеуметтiк тұрғыдан қор сезiнудiң көрiнiсi болған. Бала кезiмiзде бiзге қыстау мен жайлауға көшу артықшылық болып көрiнетiн. Жатақ бiз үшiн шынымен де кедей-кепшiктiң, жоқ-жiтiктiң өмiр салтына баланған едi. Ал бұл негiзiнде қазақтың отырықшылыққа ұмтылысы болатын. Өз тағдырын өзi шешу тұрғысындағы бастапқы қадамы. Қазақ дамуының эволюциялық жолы осы едi. Егiн егу мен мал бағудың шартын өз бетiнше жасай бастап едi. Қазiргi ауылдың көрiнiсiн қалай елестету керектiгiн әлеуметтанушылар мен тарихшылар әлi де зерттей түсу керек сияқты.
– Ал сiз осы мәселенi қаузап «Жаңғырық» атты роман жаздыңыз. Жалпы осы тақырыпқа баруға не итермеледi?
– Менi итермелеген – ұлттың болашағына деген алаң. Неге десеңiз, қалаға келген қазақтың ұлттық тамыры үзiлiп жатыр. Тарихын да, әдебиетiн де бiлмейтiн ұрпақтың толқын-толқыны лек-легiмен келiп, қазақтың рухани тағдыры бүгiнгiдей тығырыққа тiреле бастады. Мiне, соның көркем бейнесiнiң түп-төркiнiн iздеу – басты мәселе. Байқасаңыз, қалаға елу-алпыс жыл бұрын келген ұрпақ ұлттық ерекшелiгiн мүлдем сақтамайтынды шығарды.
– Сонда қазiр бiз үшiн ауылдан қол үзу қауiптi болып отыр ма?
– Ауылдан қол үзу емес, ұлттық тамырдан қол үзу – қауiптi. Ал шын мәнiнде қазiр әлi күнге қалаға келу – ауылдан қол үзуге, ал ауылдан қол үзу – ұлттық тамырдан қол үзуге әкеп соқтырып отыр.
– Қазiр қазақ – тәуелсiз халық. Еркi өзiнде. Бiр қызығы, тәуелсiздiк алған жылдары, қиыншылық кездерi тарихи отандарына кетiп қалған өзге ұлт өкiлдерiнiң көбi қайтып оралып жатыр. Бiрақ, бәрiбiр Қазақстанда халықтың 70 пайызы қазiр – қазақтар. Қала халқының да көбi қазақ екенi даусыз. Ендi осындай жағдайда әлгi ұлттық тамырдан қол үзген қазақтар өз-өзiне қайтiп оралуы мүмкiн?
– Рас, қазiр қалада тұратын, ауылдан қол үзген қазақтардың көбi өзiнiң ұлттық ерекшелiгiн сақтап отырған жоқ. Түрi қазақ болғанымен де, олардың психологиясы, тiлi, пиғылы өзге, ниетi қазаққа бұрмайды. Кейбiреулер, тiптi, қазақтың ұлттық мәселесi көтерiлсе, ашулана бастайды. Бұл тақырыпта сөз қозғағысы келмейдi. Ұлт туралы әңгiменi жек көредi. Ал осындай ұлттық дәстүрiн сақтамайтын, тiлiн бiлмейтiндердiң арасында Құдай санасына берiп, қазақтың болашағына бiр адамдай жаны ашитын, өз ұлтын сүйетiн азаматтар да аз емес. Кейде осындайларға сәби секiлдi аялап қарауымыз керек шығар деп ойлаймын. Өйткенi, олар өмiрге бейiм. Және келесiлерге дәл осылар тiкелей ықпал ете алуы да мүмкiн.
– Жаңа өзiңiз әр қазақта қалаға келгенде қорқу болатынын айтып қалдыңыз. Шынында, шетелдiктер бiзге келсе, көшеде емiн-еркiн жүредi. Ал бiздiкiлер шетелге бармақ түгiлi, туған Отанындағы қалада да өзгенiң үйiне кiрiп кеткен адамша қысылып жүредi. Осы өзiңiз айтқан қорқу неден?
– Мұның бәрi табиғатқа жақындықтың әсерi, тау мен даладан жүрген қазақ қалаға келгенде бiр күн де шыдамайтынын көзiмiз көрдi. Жаратылысқа жақын жандар қатал сынға төзiмдi, ыстық пен суыққа төтеп бередi. Ат үстiнде өмiрiн өткiзген олар қаланың тар кеңiстiгiн ешқашан мiсе тұтпайды. Мұның бейнесiн қазақ қалмагерлерi тәуiр-ақ сомдаған. Бiр нәрсе анық: қазақтың қалаға келу үдерiсi көрсетiлдi. Бiрақ әлденеше ұрпақ ауысқан кездегi ұлттық құнардан ажырау себептерiнiң образы толық жасалмаған сияқтанады.
– Ал қазiр қалаларымызды, iрi қалаларымызды әлi күнге қазақтың жатсына беруiне осы әкiмшiлiк аумақтардың көне шығыстық нақыштан гөрi батыстық, өзiңiз айтпақшы, еуропалық үлгiде салынуы, одан кейiн басқарушы билiк қазақшылығының төмен болуы себеп болып отырған жоқ па?
– Бұл мәселенi негiзiнде тереңдеп зерттеу керек. Әлеуметтiк қырынан талдаған жөн.
Әйтпесе, Отырар, Тараз, Сығанақ секiлдi қазақтың өзiне тән, шығыстық үлгiдегi тарихи қалалары бұрын да болғаны анық қой. Қазiргi қалалар олармен рухани ықпалдастықта, рухани жақындықта бола алмай отыр. Сол себептi де, iрi қалаларымыздағы көптеген үйлер – «өлi үйлер». Сыртынан қарасаң, тiршiлiктiң белгiсi жоқ қыдиған бiрдеңелер. Өзiмiздiң ұлттық ұғымдарға сәйкес, көне шығыстық үлгiге жақын, жанға жылы ғимараттар өте аз. Кезiнде Санк-Петербургтi Гоголь қалай сынаса, сол әңгiменi өзiмiзге қарата да айтуға болатын сияқты… Бұл тұрғыда, менiңше, бiзге әлi де көп iзденiп, ұлттық сәулет өнерiн қалыптастыру қажет сияқты.
Негiзiнде қазақтың өзiнiң қалалануға ұмтылысы болған. Мәселен, қазақ ауылдарын орыстар келiп салып берген жоқ. Өзiнiң талғамына сай шатыры биiк, кең, көпбөлмелi үйлерiн салып алып, ауылды стихиялы түрде жасады. Қазiр бiртiн-бiртiн сол ауылдарымыз дамып, онда үлкен-үлкен екi қабатты коттедждер салынып жатыр. Ол да шын мәнiнде дүниежүзiлiк талапқа сай келедi. Бiрақ, бұған қазақ өзiнiң iшкi қажеттiлiгiнен барып отыр.
Дәл осы орайда қала мен ауылдың арасындағы айырмашылық жойылып бара жатыр деуге болады. Мұндай үрдiс Орта Азия бойынша Қазақстанда ғана орын алған. Қазiр, расында да, байқап қарасаңыз, Алматы мен Астананың маңайындағы 100 шақырымға дейiнгi жерде орналасқан ауылдардың бәрi соңғы заманғы сәулет талабына сай зәулiм үйлер мен әдемi үлгiдегi ғимараттарға толы. Басқа қалалардың маңы да солай. Тiптi, кiшiгiрiм қалаларымыз да. Бұл жағынан қазақ халқы дамып келе жатыр деуге болады. Және бұл ешкiмнiң де нұсқауымен емес, өз шешiмiмен, өз ұмтылысымен жүзеге асып отыр.
– Демек, сiздiңше, қазақтың қалаға үдере көшуi орынды ма?
– Қоғамда көпшiлiк үшiн қастерлi бiр ортақ ұғымдар болады. Мәселен, Түркiстанға көбi рухани күш iздеп барады. Бұрынғы астаналарымыз Қызылорда, Алматыға да сондай бiр сезiммен келедi. Сол секiлдi, әрбiр адам қалаға әртүрлi қажеттiлiкпен барады. Күнкөрiсiне, тiршiлiгiне қолайлы жер iздейдi. Ал қаланың адамды үлкен ортаға бейiмдейтiндiгiн, ұлттық менталитетiмiзде бар, қанымызға сiңген ұяңдықтан арылуымызға ықпал ететiндiгiн айтар болсақ, бұл жағынан қазақтың қалалануы ұлт болашағы үшiн тиiмдi.
– Бiз ауылға барған сайын ата-енемiз: «қаланың аш-жалаңаштары келдi» деп қарсы алады. Күлiп айтады, бiрақ бәрiбiр ар жағында бiр шындық жатқаны анық. Неге десеңiз, қалада жұмыс iстеп қаржы табуға болады, дегенмен де, күнкөрiс қиын. Пәтер жалдайтыныңды былай қойғанда, қымбатшылық тағы бар.
Осы орайда сұрақ туады: халқымыздың көбi қалаға көшiп кете беретiн болса, онда қазақ еттi қайдан алады?
– Мен бұрын «қалаға көшсек, ет, сүт таппай аш қалатындай қорқамыз, не деген сорлы халықпыз!» деп ойлайтынмын. Сөйтсек, бұның орны бар екен. Қазiр дәл осы мәселе бүкiләлемдiк деңгейде үлкен проблемаға айналды. Табиғи өнiм, барлық адамға жететiн азық-түлiк, тамақ табу мәселесi қиындап барады.
Осыны сезгендiктен де шығар, шын мәнiнде қазiр бiзде ауылға қызығатындар көп. Қазақтың көпшiлiгi бүгiнге дейiн күнкөрiс үшiн қалаға қарай ағылса да, қазiр керiсiнше, мал өсiрiп, егiн салу үшiн ауылға кетуге ниеттенгендер көп. Бұған мемлекеттiк деңгейде бағдарламалар қабылданып, ауыл шаруашылығына басымдық берiлуi де ықпал етiп отырған ұқсайды.
Байқасаңыз, көпшiлiк азаматтардың қазiр қалада үйi бар. Сонымен бiрге далада да үйi бар. Соңғы жылдары әр азамат осылай өз мәселесiн шешуге, ауыл мен қала өмiрiн үйлестiруге көшкен. Бұл да ешқандай басшылықтың бұйрығынсыз, өздiгiмен шешiлiп отыр.
– Жаңа «Жаңғырық» атты романыңызды жайдан-жай айтып өткенiм жоқ. Сiз қазақтың қалаға қоныс аудару мәселесiн көтеруде тыңнан түрен салуға тырысқан жазушысыз. Бiрақ, әлi де осы тақырыпты iндетiп жүрген көрiнесiз. Көркем әдебиетке осы бағытта жаңа дүниелер әкелу ойыңызда бар ма?
– Дмитрий Поцелуевтың «Бұрынғы Алматыда» деген романы бар. Ол өзi аса сәттi шығарма емес. Дегенмен, сонда қазақтың Алматыға келуiн, үлкен қалаға шоғырлануын психологиялық жағынан аздап бейнелеген тұстар бар.
Ал «Жаңғырық» кейiнiрек дүниеге келдi. Мен негiзi бұл шығарманың атын «Қала мен дала» деп қойғым келген. Бiрақ, кiтап жарыққа шығып болмай жатып, осындай атпен газет шығып кеттi де, тақырыпты өзгертуге тура келдi.
Негiзi қала мен даланың әйтеуiр бiр үйлесетiн жерi болуы – заңды. Сондықтан, мен бұл шығармада маргиналдық құбылысқа мән беруге тырыстым. Бiраз зерттеп, зерделей келе байқағаным, маргиналдық құбылысқа әйелдер қауымы бастап барады екен. Неге десеңiз, әйелдер көрсеқызар келедi. Жаңашылдыққа, жаңа нәрселерге құмартып, ұмтылумен болады. Сөйтiп, ақыры ұлттық құндылықтарын, ұлттық ерекшелiктерiн қалай тәрк еткенiн өзi де байқамай қалады. Ал әйелдердiң ықпалына ерiп, артынан бүкiл қоғам ұлттық болмысынан ажырай бастайды.
Әйелдер ықпалды келедi. Ол туған баласын өзi секiлдi тәрбиелейдi.
Жалпы, бейiмделу, ортаға бейiмделу – жақсы қасиет. Бiрақ, тамырсыздыққа салынбау керек. Бейiмделем деп, бүкiл өз болмысыңды тәрк етуден сақтану керек. Өзгенiң ыңғайына жығыла беру де – жақсы қасиет емес.
Әңгiмелескен
Нәзира БАЙЫРБЕК