Кеше «Астаналық базарда» жұмыс жәрмеңкесі өтті. Осымен жетінші рет өткізіліп отырған жәрмеңке азаматтарға жұмыспен қамту бойынша жәрдем көрсету, қаладағы еңбек нарығының сұранысымен таныстыру мақсатымен ұйымдастырылып отыр.
Шараға жиырмадан астам жұмыс беруші компаниялар, қызмет көрсету орталықтары мен білім мекемелерінің өкілдері қатысты. Астана қаласы Еңбек инспекциясы басқармасы мен Зейнетақы төлеу жөніндегі мемлекеттік орталық қызметкерлері еңбекті қорғау, зейнетақы мен жәрдемақы алуға қатысты тұрғындардың сұрақтарына жауап берді.
– Бос жұмыстар жәрмеңкесінің көмегімен жыл басынан бері мыңнан астам адам жұмысқа орналасты. Техникалық және кәсіптік білім беру мекемелері мен жоғары оқу орындарының төрт жүзге тарта түлегі «Жастар тәжірибесі» арқылы қызмет орындарын тапты. Одан бөлек, жәрмеңкеге келушілер тегін заңгер кеңесін алды. Әкімдік тарапынан ұйымдастырылатын шараларға жұмыссыздардың белсенді араласуы, олардың еңбек нарығындағы қажеттіліктерге бейімделуі қаладағы жұмыссыздық деңгейін төмендетуге мүмкіндік береді, – дейді Астана қаласы Жұмыспен қамту және әлеуметтік бағдарламалар басқармасы басшысының орынбасары Омар Олжас.
Айгүл УАЙСОВА
