Нұр-Сұлтан қаласының Жұмыспен қамту орталығы тұрақты негізде бос жұмыс орындары жәрмеңкесін өткізуде. Биыл пандемияға байланысты шара онлайн ұйымдастырылуда.
Қала әкімдігі мәлім еткендей, жұмыс тапқысы келетіндер әлеуметтік желіден тікелей эфирлерді көре алады. Трансляция кезінде жұмыс берушілер негізгі еңбек жағдайлары мен бос жұмыс орындары туралы айтады.
«Орташа алғанда, бір шағын сұхбат шамамен 10-15 минутты құрайды. Бұл кезде компания өкілдері негізгі жұмыс жағдайларын түсіндіреді. Тікелей эфирді көретіндер және жұмыс орнына қызығушылық танытқандар компанияның байланыс ақпаратын жазып алып, пікір қалдыра алады немесе Жұмыспен қамту орталығына хабарласса, олар қажетті деректерді табуға көмектеседі» деп түсіндірді жұмыс берушілермен өзара іс-қимыл бөлімінің басшысы Бақыт Рақышева.
Айта кетейік, құрылыс, сауда, тамақ және денсаулық сақтау салаларының мамандары бүгінде еңбек нарығында ең көп сұранысқа ие. Сұранысы жоғары мамандықтар қатарында жұмысшы, монтажшы, бригадир, кірпіш қалаушы, арматурашы, кассир, сатушы, санитар және тағы басқалары бар.
«Тұрғындар өз қалауына байланысты жұмыс таба алады. Көбіне басқа формат ұсынылады, оның ішінде жартылай жұмыс күні де бар» деп түсіндірді Жұмыспен қамту орталығында.
Онлайн жәрмеңкелер әр екі апта сайын бейсенбі күні сағат 15:00-де Нұр-Сұлтан қаласының Жұмыспен қамту орталығының Instagram парақшасында өтеді. Бос жұмыс орындар жәрмеңкесінің толық нұсқасын IGTV-де көруге болады. Вакансиялар туралы ақпарат www.enbek.kz порталында да жарияланады. Қосымша ақпаратты 7 (7172) 57 89 37, 57-88-89, 24-83-02, 8 777 116 82 73 телефондары арқылы алуға болады. Жұмыспен қамту орталығының мекенжайы: Бейбітшілік көшесі, 25, «Өркен» іскерлік орталығы.
