Қалалық мәслихаттың көпшілік тыңдауларында «Жұмыспен қамту 2020 жол картасы» бағдарламасы аясында жұмыссыздықты төмендету және халықты жұмыспен қамтуға қол жеткізу жөніндегі жұмыс жағдайын қарады. Осы тақырыпта баяндама жасаған Жұмыспен қамту, еңбек және әлеуметтік қорғау басқармасы басшысының міндетін атқарушы Артем Әбілдинов елорда еңбек нарығындағы ахуал туралы ақпарат берді.
Ағымдағы жылдың үшінші тоқсанындағы мәліметтер бойынша қаладағы жұмыссыздық деңгейі 4,6 пайызды құрайды. Бұл – жұмыссыздықтың ең төменгі деңгейі ретінде республика бойынша оң нәтиже.
2016 жылдың 1 желтоқсанына дейін Жұмыспен қамту орталығына 12 912 азамат өтінішпен келсе, оның ішінде 10 193 адамға жұмыссыздықтан қорғаудың әлеуметтік шаралары көрсетілген. Атап айтқанда, 5 985–і тұрақты жұмысқа орналасса, 2 137 адам қоғамдық жұмыстарға тартылған, 661 оқу орындарының түлектері жастар тәжірибесінен өткен. Әлеуметтік жұмыс орындарына 121 адамды қамтып, 590 адам инфрақұрылымдық жобаларға қамтылған. Баяндамашы 2020 жылға дейін жұмыссыздық деңгейін 4,5 пайызға төмендету көзделіп отырғанын айтты.
Бұл мақсатта мемлекеттік бағдарламаларға қатысумен қатар тұрғындармен ақпараттық жұмыстарды қатар жүргізудің маңыздылығына тоқталды.
Жыл басынан бері бұқаралық ақпарат құралдарымен тығыз жұмыс жүргізілген. Ақпараттық-түсіндірме жұмыстары әлеуметтік желілерден де тұрақты беріліп отыр.
Биыл өткізілген 12 бос орындар жәрмеңкесінде жастар мен әйелдердің және мүмкіндігі шектеулі жандардың да жұмыс табуына мүмкіндіктер жасалды.
Жұмыспен қамту орталығының 5 өкілдігі «Астаналық» базарда, «Гүлжан», «Рахмет-2», «Аружан» және «Астықжан» сауда үйлерінде орналасқан. Сонымен қатар, қаладағы үш мешітте апта сайын орталықтың мамандары көпшілікпен сұхбаттасып, жұмысқа орналасу бойынша кеңестер беруді дәстүрге айналдырған. Бұдан да өзге, жұмыссыздыққа қарсы шаралар ұйымдастырылып, бұл мәселені шешуде тұрғындардың белсенділігі артып келеді.
Баяндамашының есебінен кейін мәслихат депутаттары жұмыссыздықты төмендету шараларына қатысты сұрақтарына жауап алды, сонымен бірге, бұл саладағы жұмысты жандандыру мақсатында өз ұсыныстарын айтты.
Айгүл УАЙСОВА
